Сè повеќе централни банки ширум светот се свртуваат кон купување злато директно од домашни рудници, со цел зголемување на резервите и поддршка на локалната индустрија, покажува истражувањето на Светскиот совет за злато (WGC).
Во последното истражување, 19 од 36 централни банки изјавиле дека веќе купуваат злато од домашни, мали рудници, додека четири други размислуваат да го следат примерот. Во споредба со минатата година, трендот е во пораст.
Меѓу земјите кои активно ја применуваат оваа стратегија се Гана, Танзанија, Колумбија, Замбија, Монголија и Филипините. Гана, на пример, има договор со рударски компании за откуп на 20% од нивното производство, додека Танзанија им наредила на извозниците да го продаваат истиот процент од златото на централната банка.
Преку купување директно од извор, централните банки избегнуваат девизни трошоци и заштедуваат на банкарски провизии, посредници и транспорт. Дополнително, во многу случаи добиваат злато со попуст во однос на глобалната цена.
Цените на златото се на рекордно ниво – 3.328,3 долари за унца, што претставува раст од речиси 27% од почетокот на годината. Во услови на геополитичка неизвесност, овој пристап станува сè поатрактивен за земјите производителки, велат експертите.
