Захарова: Европа плаќа за „оружје пред смрт“ – критика до договорот за испорака на американско оружје во Украина
Портпаролката на руското Министерство за надворешни работи, Марија Захарова, остро ја критикуваше идејата Европа да ги покрива трошоците за испорака на американско оружје во Украина, споредувајќи ја ситуацијата со плаќање храна за човек кој потоа ќе умре.
„Ако ветувате дека ќе испорачате оружје, но велите дека некој друг ќе плати за него – тогаш вие не сте вистинскиот снабдувач, нели?“, изјави шефицата на европската дипломатија, Каја Калас, коментирајќи ја најавата на американскиот претседател Доналд Трамп за испраќање на ракетни системи „Патриот“ во Украина.
Захарова го искористи нејзиниот коментар како повод за иронична паралела:
„Дали Каја навистина почна да разбира нешто? Ајде да и помогнеме: тоа е како да ви велат да платите за храна, но некој друг ќе ја изеде – и ќе умре. Нели?“, напиша таа на својот канал на Телеграм, пренесе новинската агенција Спутник.
Изјавата доаѓа во контекст на новиот предлог договор, според кој САД би снабдувале оружје за Украина, а Европската Унија би ги покривала трошоците. Според Трамп, договорот вклучува не само ракети, туку и целосни системи за противвоздушна одбрана како „Патриот“.
Во понеделникот, Трамп и официјално ѝ постави ултиматум на Москва, барајќи мировен договор со Киев во рок од 50 дена. Доколку тоа не се случи, тој се закани дека ќе воведе 100-процентни царини за руски увоз и дополнителни санкции за земјите што продолжуваат да купуваат руски енергенси.
Размената на остри изјави повторно ја вжештува дипломатската сцена, во момент кога Европа и САД се обидуваат да ја координираат воената и економската поддршка за Украина.
