Република

Општинскиот инспекторат на Битола започна со дежурства: Над 30 прекршувања регистрирани уште првата ноќ

Во насока на зајакнување на контролата и заштитата на јавниот интерес, Општинскиот инспекторат при Општина Битола од вчера започна со теренски дежурства надвор од редовното работно време. Веќе при првото дежурство, инспекторите констатираа над 30 случаи на прекршувања, најмногу поврзани со градежништво, јавна чистота и комунални дејности.

Инспекцискиот тим интервенираше во ситуации со неправилно управување со градежен шут, комунален и друг отпад – појави кои сериозно ја загрозуваат животната средина и урбаното уредување на градот. За дел од прекршителите беа изречени усни опомени со рок за отстранување на неправилностите, а некои од нив веќе почнаа со постапување.

Дежурниот инспекциски тим постапуваше и по пријави од граѓани, што ја истакнува важноста на граѓанската вклученост во зачувувањето на јавниот ред. За случаите кои не се во надлежност на инспекторатот – како што се улични трки, бучава од сообраќајот или диви возења – граѓаните беа упатени да пријавуваат директно во СВР Битола.

Вонредните контроли ќе продолжат и во наредните денови. Општина Битола ги охрабрува граѓаните да пријавуваат прекршувања и по работно време на дежурниот број 075 388 797.

Со воведувањето на дежурствата, Битола покажува решителност во справувањето со урбаните и еколошки предизвици, во насока на создавање почиста, побезбедна и поуредена средина за сите.

Република

Повеќе тетовски села утре без електрична енергија поради планирани прекини

Повеќе села во тетовскиот регион утре, 18 декември, ќе останат без електрична енергија поради планирани прекини во снабдувањето со струја, информираат надлежните служби.

Без струја во периодот од 09:00 до 14:00 часот ќе бидат делови од селото Челопек, и тоа објекти лоцирани во средниот дел на селото, како и објекти во близина на училиштето. Исто така, прекин во снабдувањето ќе има и во селото Милетино, каде без електрична енергија ќе останат објекти во близина на автобуската станица во т.н. Македонско Маало.

Планиран прекин е најавен и за селото Порој, каде дел од населението исто така ќе биде без струја во истиот временски интервал.

Од надлежните апелираат граѓаните навремено да ги планираат своите обврски и информираат дека прекините се дел од редовни активности за одржување и унапредување на електродистрибутивната мрежа.

Република

Проданоски ги отвори вратите на Општината за најмладите

Кабинетот на градоначалникот на Општина Прилеп, Дејан Проданоски, денеска беше исполнет со детска љубопитност и насмевки, откако во посета пристигнаа четвртоодделенци кои, во рамки на наставната програма, учат за локалната самоуправа и надлежностите на градоначалникот.

Учениците имаа можност одблизу да се запознаат со работата на општината, поставувајќи бројни интересни и искрени прашања, на кои градоначалникот одговараше низ пријатен и едукативен разговор.

Проданоски истакна дека ваквите средби се особено значајни, бидејќи ја поттикнуваат младата генерација да развива интерес за општествените процеси и институциите.

„На младите им припаѓа иднината, а наша обврска е континуирано да работиме на подобрување на условите за живот и создавање подобра и посигурна иднина за нив“, порача градоначалникот Проданоски.

Република

Општина Битола инсталира фотоволтаици во уште три училишта

Општина Битола продолжува со активна имплементација на праведната енергетска транзиција, со цел поголемо искористување на обновливите извори на енергија.

На следната седница на Советот на Општина Битола ќе се разгледува анекс на договорот со Фондацијата Отворено Општество, со кој Општината ќе добие донација за поставување фотоволтаици на уште две основни училишта – „Св. Климент Охридски“ и централното училиште „Даме Груев“.

Анексот претставува дополнување на претходниот договор, со кој минатата година беа инсталирани фотоволтаици на шест основни училишта во градот.

Во рамки на заложбата за искористување на обновливата енергија, Општината ќе постави фотоволтаици од сопствени средства и на една од зградите на основното училиште „Гоце Делчев“.

Овој проект е дел од стратегијата на Општина Битола за поддршка на одржливи решенија и намалување на трошоците за енергија во образовните институции.