Балкан

Само на Балканот: Човек починал на плажа, телото стоело два часа под чадор на преполна плажа

Тешка сцена се одигра во понеделникот на плажата во Промајна, кај Башка Вода (Хрватска), каде што бројни туристи биле сведоци на трагедија што заврши со смрт.

Според сведоштвото на еден турист од Тузла, кој со семејството престојувал на плажата, маж од Мостар го загубил животот додека пливал во морето. Како што раскажува сведокот за босанскиот портал Фокус, никој веднаш не забележал што се случило.

„Човекот се удави, го извадија од морето, но никој не забележа веднаш. Повикаа Брза помош, лекарите се обидуваа да го реанимираат скоро еден час, но безуспешно. Кога констатираа дека нема спас, едноставно го оставија под чадор на среде плажа и си заминаа. Телото лежеше таму повеќе од два часа“, вели очевидецот.

Посебен шок меѓу присутните предизвикало тоа што покрај телото немало никого освен полицијата, ниту роднини, ниту пријатели. „Никој не знаеше кој е. Само го оставија и заминаа. Луѓето беа згрозени – лежеше на сонце, пред сите, како да не е човек“, продолжува сведокот.

Ситуацијата станала уште понереална кога една жена дошла да го побара својот чадор, под кој било оставено телото. Полицијата ѝ го вратила, оставајќи го починатиот на отворено, на видикот на сите присутни на плажата.

Дури во вечерните часови се појавила неговата жена која започнала да го бара, бидејќи не се вратил дома. Така дознала што се случило. Се испоставило дека мажот бил од Мостар и дека имал куќа во близина, каде што престојувал како турист.

„Тешко е да се гледа телото оставено на плажата цели два часа. Дури потоа дојдоа погребни служби со ковчег, го ставија телото и го однесоа, додека целата плажа немо набљудуваше“, завршува сведокот.

Непријатната сцена, како што додава, не е нешто што човек очекува да го доживее за време на одмор: „Сè е тоа дел од животот, но начинот на кој беше постапено – да го остават така среде плажа – беше апсолутно надреално“.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.