Американскиот претседател Доналд Трамп изјави дека првите батерии од ракетниот систем Patriot се веќе на пат кон Украина, во рамки на новата стратегија на НАТО и Европската унија за поддршка на украинската одбрана.
„Тие се веќе испратени. Доаѓаат од Германија, а Германија ќе ги надомести. Во сите случаи, САД ќе добие целосна финансиска компензација“, изјави Трамп од воздухопловната база Џоинт Бејс Ендрус.
Испораката доаѓа во клучен момент за Украина, која се соочува со засилени руски ракетни напади врз своите градови и очајно бара дополнителни системи за противвоздушна одбрана. Според Трамп, новиот модел на воена помош подразбира купување американски системи од страна на НАТО и ЕУ, нивно испраќање во Украина, а потоа и финансиска компензација за Вашингтон од европските партнери.
Германската влада веќе претходно потврди дека се разгледува испраќање најмалку три Patriot системи кон Киев, како дел од координираниот одговор на европските сојузници.
Два дена пред оваа најава, Трамп издаде остар ултиматум до Москва, барајќи мир во рок од 50 дена или во спротивно САД ќе воведе „строги царини“. Кремљ ја опиша оваа изјава како „сериозна закана“ и најави дека ќе ја анализира внимателно пред официјален одговор.
Трамп нагласи дека не разговарал со рускиот претседател Владимир Путин откако на 14 јули беа воведени нови санкции против Русија. „Разочаран сум во претседателот Путин. Очекувавме договор пред два месеца“, рече тој.
Во обид да се дистанцира од конфликтот, Трамп повтори: „Ова не беше моја војна. Ова беше Бајденова војна. Јас се обидувам да ве извлечам од неа.“
