Цела Централна Македонија е во паника: илјадници тони свежо набрани праски може да завршат на буниште откако американскиот претседател Доналд Трамп воведе нова 30% царина на европски производи. За грчките земјоделци и фабрики кои живеат од извозот на овошје – ова е економска катастрофа.
„Ова нè удри кога најмногу работиме, кога фабриките работат 24/7“, вели Лазарос Јоанидис, ко-сопственик на фабрика во Науса, која 40% од производството го извезува во САД. Новите царини би ја зголемиле вкупната увозна тарифа за праските на дури 47%, што би ја направило нивната цена неконкурентна на американскиот пазар.
Грција е светски лидер во извоз на конзервирани праски, а американскиот пазар вреди околу 120 милиони евра годишно. Извозот во САД е 4% од вкупниот грчки извоз, но за регионот – тоа е животна артерија. Над 20.000 семејства зависат од овоштарството и преработката на праски.
„Последниве шест месеци, откако Трамп дојде, е тотален хаос,“ вели Костас Апостолу, претседател на Асоцијацијата на конзервирачи. „Не бараме милост. Само слободен пазар.“
И додека некои гледаат кон Мексико, Индија и земјите од Меркосур како можни нови пазари, земјоделците се очајни. „Трамп е непредвидлив, можеби ќе ја повлече оваа одлука“, вели фармерот Вангелис Караиндрос додека бере зрели праски со работниците.
Но ако не – цела една индустрија може да згасне под тежината на новите царини.
