Во изминатото деноноќие во земјата се евидентирани вкупно 35 пожари на отворен простор, од кои четири се сѐ уште активни, четири се ставени под контрола, а 27 се целосно изгаснати.
Активни пожари се регистрирани во селата Нивичино (Василево), Грешница (Македонски Брод), на подрачјето меѓу Царевиќ и Смолани (Прилеп), како и во Виштица (Липково). Станува збор за пожари во нискостеблеста и мешана шума, како и деградирана вегетација.
Пожарите под контрола се лоцирани во Велешко, Дојран, Демир Хисар и Македонски Брод. Останатите пожари, најголем дел од нив на подрачја со ниска вегетација, стрништа и депонии, се изгаснати.
Надлежните служби остануваат на терен и продолжуваат со активностите за целосно справување со пожарите.
