Објавени нови вознемирувачки детали од разговорот помеѓу пилотите пред падот на „Ер Индија 171“: “Авионов е во твои раце”

Загадочна авионска несреќа во Индија: Намерно исклучени мотори пред падот на „Ер Индија 171“

Несреќата на летот „Ер Индија 171“ од Ахмедабад до лондонскиот аеродром Гетвик, што се случи на 12 јуни, однесе 260 животи – меѓу кои и цивили на земја. Новите откритија од истрагата откриваат шокантен пресврт: трагедијата, според истражителите, не е предизвикана од технички дефект, туку од човечки фактор.

Според италијанскиот весник Кориере дела Сера, кој доби пристап до снимките од црната кутија, капетанот Сумит Сабарвал му го препуштил управувањето на првиот офицер Клајв Кундер, изговарајќи: „Авионов е во твои раце“. Ова било забележано само неколку минути пред несреќата.

Три секунди по полетувањето, со брзина од над 330 километри на час, некој – најверојатно капетанот – ги исклучил моторите, прекинувајќи го доводот на гориво. На снимката јасно се слуша звукот на прекинувач, проследен со вознемирениот глас на офицерот: „Зошто ги исклучи моторите?“ – на што капетанот неубедливо одговара: „Не јас“.

И покрај обидите за повторно вклучување на моторите, авионот немал доволно висина. Само неколку секунди по алармот „Mayday“, комуникацијата прекинува, а леталото удира во згради близу аеродромот.

Капетанот Сабарвал (56), искусен пилот со над 15.000 летачки часови, бил на прагот на пензија. Според блиски извори, размислувал за повлекување поради семејни причини.

Индиските власти повикуваат на трпеливост, бидејќи конечниот извештај сè уште не е објавен. Сепак, според меѓународни експерти, досегашните докази укажуваат на тоа дека моторите биле исклучени рачно – и намерно.