Едноставна навика што го продолжува животот: Ризикот од смрт се намалува и до 40%
Редовната физичка активност што го забрзува срцето и дишењето може да го намали ризикот од предвремена смрт дури за 40%, покажува најобемната мета-анализа досега, спроведена врз 7 милиони луѓе ширум светот.
„Физичката активност е можеби најважниот фактор за долговечност,“ вели д-р Џорџ Милки од Универзитетот Квинсленд, коавтор на студијата објавена во British Journal of Sports Medicine. Неговиот став го дели и д-р Ендрју Фриман од болницата National Jewish Health во Денвер: „Вежбањето е вистински еликсир на младоста. Ништо не делува така силно и сеопфатно.“
Добрата вест е – никогаш не е доцна да се започне. Дури и лицата што почнале да вежбаат во подоцнежни години бележат значителни здравствени придобивки, особено постарите со хронични болести – кај нив ризикот се намалува и до дополнителни 15%.
Светската здравствена организација препорачува:
150–300 минути неделно умерено аеробно вежбање или
75–150 минути интензивна активност (брзо одење, трчање).
Оние што вежбале најмногу имале 40% помал ризик од срцеви болести и 25% помал ризик од смрт поради рак, во споредба со неактивните. Најголема корист е забележана кај луѓето кои вежбале барем 300 минути неделно – но над таа граница ефектите не се значајно поголеми.
Важно е да се истрае – тие што престанале да вежбаат, повторно се соочиле со зголемен ризик. Но, и минимално ниво на активност е подобро од целосна неактивност.
Д-р Фриман препорачува најмалку 30 минути брзо одење дневно, а за уште подобри резултати – да се додадат и вежби за сила, како носење лесни тегови или возење велосипед по угорнина.
„Најважно е движењето да стане дел од секојдневието – во форма што најмногу ви одговара,“ заклучува д-р Милки.
