Русија ја прекинува соработката: Повлекување од договорот со Германија за воено-техничка соработка
Рускиот премиер Михаил Мишустин потпиша одлука со која се повлекува Русија од билатералниот договор за воено-техничка соработка со Владата на Сојузна Република Германија.
Како што пренесува агенцијата ТАСС, Министерството за надворешни работи на Руската Федерација добило задолжение да ја информира германската страна за донесената одлука.
Договорот, кој датира од 1996 година, беше основа за унапредување на соработката меѓу руските и германските компании, институции и агенции во сферата на воената и техничката индустрија. Но, според руското МНР, во актуелниот геополитички контекст тој повеќе нема ниту суштинска ниту практична вредност.
„Договорот повеќе не соодветствува со сегашното ниво на меѓудржавни односи помеѓу Русија и Германија, особено поради отворено непријателската политика на германските власти и сè поагресивните милитаристички амбиции на германската влада“, се наведува во соопштението на руското Министерство за надворешни работи.
Од министерството исто така обвинија дека германското раководство „свесно го индоктринира сопственото население со антируска пропаганда и отворено провоцира ескалација на воено-политичката ситуација во Европа“.
Со оваа одлука, Москва формално го затвора последниот канал на официјална воено-техничка комуникација со Берлин, што претставува уште еден сигнал за продлабочување на геополитичката дистанца меѓу двете земји.
