Свет

Само шест американски конгресмени гласале против 500 милиони долари за израелскиот ракетен програм

Претставничкиот дом на американскиот Конгрес со убедливо мнозинство го одби амандманот со кој требаше да се отстрани одредбата за доделување 500 милиони долари на Израел за развој на ракетни системи. Законот за буџетски издвојувања за одбраната беше усвоен заедно со оваа финансиска поддршка, а само шестмина конгресмени гласаа за предложениот амандман.

Амандманот го поднесе републиканската конгресменка Марџори Тејлор Грин, која образложи дека САД веќе испраќаат милијарди долари на Израел, посочувајќи и на последните воени дејствија во Газа.

„Израел ја бомбардираше Католичката црква во Газа, а целото население се брише додека нивната агресивна војна продолжува“, изјави Грин, позната поддржувачка на претседателот Доналд Трамп и неговото движење „Да ја направиме Америка повторно голема“.

Таа нагласи дека годишните 3,5 милијарди долари што САД ги испраќаат на Израел се „огромна сума“, а потсети и дека безбедносниот пакет од април 2024 година содржеше дополнителни 8,7 милијарди долари во поддршка на Израел. Притоа посочи дека Израел обезбедува универзално здравствено осигурување и субвенционирано високо образование за своите граѓани, додека САД се соочуваат со јавен долг од над 37 билиони долари.

„Овој амандман ќе обезбеди Министерство за одбрана кое ја става Америка на прво место — токму она што ни е потребно“, истакна конгресменката.

Ова не е првпат Грин да ја критикува американската финансиска и политичка поддршка за Израел. Во едно претходно интервју со контроверзниот новинар Тaкер Карлсон, таа изрази изненаденост од своите колеги кои, како што рече, „го ставаат Израел на прво место“.

„Некои од нив биле дел од израелската армија и се гордеат со тоа. Тие имаат лојалност кон друга држава. Сето тоа станува очигледно — во нивните објави на социјалните мрежи, во изјавите што ги даваат. Мораат да изразат поддршка за Израел. Мораат да покажат вера и лојалност“, рече тогаш Грин.

Предлог-амандманот беше поразен со големо мнозинство, што уште еднаш ја потврдува длабоко вкоренетата поддршка за Израел во американскиот Конгрес, и покрај се погласните критики во јавноста.

Свет

Хаос на европските аеродроми по воведувањето на новиот Шенген систем

Воведувањето на Шенген системот за влез и излез (EES) на 12 октомври 2025 година предизвика сериозни проблеми на аеродромите во Европа, при што патниците во периоди на зголемена фреквенција чекаат и до три часа за да поминат гранични контроли, соопшти Европскиот оддел на Меѓународниот совет на аеродроми (ACI).

Оттаму велат дека прогресивното снимање на биометриски податоци и регистрација на државјани од трети земји ја зголемуваат обработката на патниците до 70%, а недостигот на киосци и полициски кадар дополнително ја усложнува ситуацијата. Најзасегнати се аеродромите во Франција, Германија, Грција, Исланд, Италија, Португалија и Шпанија.

ACI повикува Европската комисија, eu-LISA, Фронтекс и земјите-членки итно да преземат мерки или да овозможат поголема флексибилност во примена на системот до целосното воведување. Генералниот директор на ACI EUROPE, Оливие Јанковец, предупредува дека доколку проблемите не се решат пред зголемувањето на прагот за регистрација на 35% од 9 јануари, хаосот на аеродромите ќе се продлабочи, со сериозни последици по безбедноста и оперативноста.

Свет

Украински дронови предизвикаа штета на руската нафтена инфраструктура во Таман

Украински беспилотни летала го погодиле руското пристаниште Таман во Црното Море, при што биле оштетени две пристаништа, еден цевковод за снабдување со мазут и два танкера, соопшти регионалната администрација на Краснодарската област. На едниот танкер избувнал пожар кој веќе е изгаснат, а два резервоари за складирање биле оштетени од падот на остатоци од дрон.

Службите за цивилна заштита информираат дека екипажите на погодените бродови се евакуирани, а пожарите се целосно изгаснати. Пристаништето Таман се смета за клучна точка за испорака на нафта и течен природен гас.

Украина зачестено ги напаѓа руските нафтени и енергетски објекти како дел од својата одбрана од руската инвазија.

Свет

Пентагон алармира: Кина тајно распоредила над 100 нуклеарни ракети – можно воено сценарио за Тајван до 2027

Најнов извештај на Пентагон, сè уште необјавен, открива дека Кина значително го забрзува својот нуклеарен капацитет и не покажува интерес за преговори за контрола на оружјето. Според американските разузнавачи, Пекинг тајно распоредил повеќе од 100 интерконтинентални балистички ракети од типот ДФ-31 во „полиња со силоси“ во близина на границата со Монголија, што им овозможува брзо лансирање во случај на конфликт.

Американскиот претседател Доналд Трамп претходно најави план за денуклеаризација во соработка со Кина и Русија, но извештајот на Пентагон укажува дека Пекинг не покажува сериозен интерес за такви мерки или разговори за контрола на вооружувањето.

Според документот, кинескиот нуклеарен арсенал сè уште брои под 600 боеви глави, но експанзијата продолжува, а до 2030 година се очекува бројката да надмине 1.000. Пентагон истакнува дека клучната година е 2027, кога Кина се проценува дека ќе биде способна да води и да победи во потенцијален конфликт за Тајван.

Стратегијата на Пекинг вклучува удари на далечина од 1.500 до 2.000 наутички милји од кинескиот брег, со што би можело сериозно да се попречи американското воено присуство во Азиско-пацифичкиот регион. Кина засега го застапува ставот дека се придржува до „нуклеарна стратегија на самоодбрана“ и политика на ненапаѓање, додека Пентагон предупредува на зголемената закана за стабилноста во регионот.