Црна Хроника

Охрид: Пронајдено безживотно тело кај хотелски комплекс, полицијата врши увид

Вечерва околу 19:50 часот, кај рампата што води кон хотелскиот комплекс „Инекс“ и претседателската вила во Охрид, беше пронајдено безживотно тело на маж, потврдија од Министерството за внатрешни работи (МВР).

Местото на настанот е целосно обезбедено со полициски ленти, а екипи од итната медицинска помош и форензичари извршија увид и собирање на траги. Присуството на полицијата и службените лица предизвика големо внимание кај минувачите и гостите во близина.

Засега не се соопштуваат детали за идентитетот на починатиот, ниту за причините за смртта. Од СВР Охрид информираат дека повеќе информации ќе бидат објавени утре, откако ќе заврши увидот и ќе се добијат насоки од надлежното Обвинителство.

Настанот ја вознемири јавноста во Охрид, особено поради чувствителноста на локацијата на која е пронајденото телото – во близина на објект од државно значење.

Црна Хроника

Застој на автопатот Скопје–Тетово, камион се превртел кај Желино

Тешка сообраќајна незгода се случи пред малку на автопатот Скопје – Тетово. Според првичните информации, камион се превртел веднаш по наплатната рампа кај Желино, што предизвика значителен застој во сообраќајот.

Блокирани се првите две ленти, а возилата се пропуштаат само по третата лента.

Дополнителен проблем за возачите претставуваат временските услови. На овој патен правец има појава на густа магла, која значително ја намалува видливоста.

Се апелира до сите учесници во сообраќајот да ја прилагодат брзината на условите на патот, да држат соодветно растојание и да бидат исклучително внимателни додека поминуваат на овој потег додека трае увидот и расчистувањето на теренот.

Црна Хроника

Две жени нападнати во автобуси на ЈСП во Скопје

Во два одделни инциденти на 19 декември 2025 година, две жени од Скопје биле физички нападнати додека се возеле во автобуси на ЈСП.

Првиот случај се случил околу 15:00 часот во подрачјето на Гази Баба, кога А.С. (46) пријавила дека била нападната од И.С. (39) од Скопје.

Вториот инцидент се случил околу 17:20 часот во подрачјето на Драчево, кога С.Ј. (55) била нападната од непознато женско лице додека се качувала во автобус.

Полицијата презема мерки за расчистување на двата случаи.

Црна Хроника

НОЌНА АКЦИЈА ВО ТЕТОВО – МВР со детали

На 19.12.2025 година во времето од 22:10 до 23:55 часот полициски службеници од СВР Тетово во содејство со Државен инспекторат за труд, Државен пазарен инспекторат и Управа за јавни приходи, извршиле акциска контрола во угостителски објекти во подрачјето на СВР Тетово. При тоа во угостителски објект во Тетово на ул.,,Јован Ончески” каде како управители се пријавиле И.С.(23) и М.Ј.(22), двајцата од с.Брвеница, биле затекнати шест малолетни лица, кои биле послужени со алкохолни пијалоци. Малолетниците се предадени на нивните родители и против сопствениците ќе следува соодветен поднесок во врска со сторено кривично дело „точење алкохол на малоетници“ согласно член 204 од КЗ на РСМ, додека од страна на другите органи биле преземени мерки и активности од нивна надлежност.