Премиерот Христијан Мицкоски денеска присуствуваше на стартот на реконструкцијата на објектот на гимназијата „Кирил Пејчиновиќ“ во Тетово. Тој порача дека вложувањето во образованието е инвестиција во иднината на државата.
„Сигурен сум дека и во иднина од овој објект ќе излегуваат многу луѓе кои што ќе додадат вредност не само за Тетово, него и за Македонија како држава“, изјави Мицкоски.
Премиерот нагласи дека Владата останува посветена на исполнување на ветувањата и на очекувањата на граѓаните, оценувајќи дека започнува нов период на прогрес и стабилност.
„Продолжуваме понатаму со реализација на ветеното, продолжуваме понатаму во реализација на она кое што граѓаните го очекуваат од нас како Влада. Ги градиме темелите на промените, доаѓа времето на Македонија“, рече Мицкоски.
