Рускиот претседател Владимир Путин го удвои стандардниот бонус за регрутирање во армијата од 195.000 на 400.000 рубљи, што е речиси петкратник на просечната месечна плата во Русија, пренесува Business Insider. Мерката е дел од поширока стратегија за поддршка на инвазијата врз Украина, но таа веќе сериозно го оптоварува руското стопанство, покажува извештај на Институтот за проучување на војната (ISW).
Борбата за работна сила меѓу армијата и цивилниот сектор предизвика пораст на платите и цените, особено во услужните дејности. Армијата стана директен конкурент на приватниот сектор, што дополнително ги нарушува пазарните рамнотежи. ISW предупредува дека Русија „пали свеќа од двете страни“ – ја олеснува монетарната политика за да го поттикне растот, додека истовремено ја зголемува воената потрошувачка, што ја турка економијата кон нестабилност.
Според проценките на Центарот за стратешки и меѓународни студии (CSIS), Русија досега има над 950.000 загинати и ранети војници во војната, што ја прави политиката на стимулативно регрутирање и понатаму суштинска, но и скапа.
Иако краткорочно овие потези помогнаа за раст на БДП во 2023 и 2024 година, главно преку инвестиции во одбранбената индустрија, економијата веќе покажува знаци на прегревање. Руската централна банка мораше неколкупати да ги зголеми каматните стапки за да ја стабилизира ситуацијата, но тоа главно ги погоди нерегрутните сектори бидејќи воено-индустрискиот комплекс останува заштитен преку државните набавки.
Според анализата на бриселскиот тинк-тенк Bruegel, рускиот модел на воено стопанство се соочува со сериозни структурни предизвици: загуба на извозни пазари за оружје, трошоци поврзани со избегнување санкции, слаби миграциски политики и недостиг на квалификувана работна сила.
Како што заклучуваат економистите, и покрај моменталната отпорност поттикната од воената потрошувачка, долгорочната стабилност на руската економија останува под закана.
