Брачна двојка од местото Самтенс, во германската сојузна покраина Мекленбург-Западна Померанија, стана жртва на софистицирана банкарска измама и изгуби речиси 160.000 евра.
Сè започнало кога 69-годишната жена добила телефонски повик од број кој ѝ изгледал како службен број на нејзината банка. Повикот го примила од човек кој се претставил како вработен во банката и ја предупредил на наводни нерегуларности на нејзината сметка. Уверена дека разговара со вистински банкар, жената му ги дала своите пристапни податоци и TAN-кодовите.
Измамниците отишле чекор понатаму – преку мобилна апликација за пораки ѝ испратиле QR-кодови за генерирање дополнителни TAN-кодови, што им овозможило целосен пристап до нејзината банкарска сметка. Следниот ден, жената забележала сомнителни трансакции и веднаш ги блокирала сите сметки, но парите веќе биле повлечени.
Германската полиција се сомнева дека станува збор за таканаречена „spoofing“ измама – метод при кој измамниците користат лажни броеви на повик за да создадат впечаток дека повикот доаѓа од легитимна институција, како што е банка.
„И покрај тоа што бројот изгледа автентичен, не му верувајте на повикувачот само врз основа на тоа“, предупредуваат германските власти. Полицијата апелира до граѓаните никогаш да не споделуваат лични податоци, лозинки или кодови преку телефон, дури ни ако повикот делува убедливо.
Случајот е под истрага, а властите повторно потсетуваат дека вистинските банки никогаш не бараат чувствителни информации преку телефон или пораки.
