Собранието го усвои Ребалансот на Буџетот за 2025 година, а министерката за финансии Гордана Димитриеска-Кочоска истакна дека ова не е техничка корекција, туку внимателно планиран економски чекор со конкретна цел – развој, стабилност и социјална правда.
Со ребалансот се предвидува повеќе пари за повисоки пензии и плати, зајакната социјална заштита и нови средства за капитални проекти. Дефицитот останува стабилен на ниво од 4% од БДП, што според Министерството за финансии, покажува фискална одговорност и стабилност.
– Секоја ставка во ребалансот е резултат на внимателна анализа. Ова е буџет за раст, сигурност и фискална дисциплина, изјави Димитриеска-Кочоска.
Дополнително, ребалансот вклучува насочена поддршка за домашната економија и за стратешките инвестиции, со фокус на долгорочен економски напредок.
Министерството за финансии нагласува дека овие мерки се прилагодени на актуелните економски услови и се одговор на барањата на граѓаните за подобри услуги, социјална заштита и сигурна иднина.
