Русија без големи очекувања од новата рунда преговори со Украина во Истанбул

Портпаролот на рускиот претседател, Дмитриј Песков, изјави дека не треба да се очекуваат значајни пробиви на новата рунда преговори помеѓу Русија и Украина, која треба да се одржи во Истанбул. Според него, прашањето за постигнување украински мировен договор е толку комплексно, што дури и евентуалното постигнување договор за размена или враќање на телата на загинатите би претставувало успех.

„Пред да се размислува за можноста од одржување состаноци меѓу Русија и Украина на високо или највисоко ниво, неопходна е долга и сериозна дипломатска подготовка“, нагласи Песков, пренесе агенцијата „Спутник“. Тој додаде дека временската рамка за евентуално постигнување договор ќе зависи од многу фактори, како на теренот, така и во политичките центри.

Во рамки на претстојните разговори, двете страни ќе разгледуваат тешки теми, вклучително и можни нацрт-меморандуми за политичко регулирање на конфликтот.

Песков изрази надеж дека новата рунда преговори ќе се одржи во текот на неделата, а Кремљ ќе ги објави точните датуми кога ќе бидат дефинирани.

„Русија во процесот на украинско регулирање ќе настојува да ги обезбеди сопствените национални интереси. Засега не постојат услови за одржување самит на лидерите на земјите-членки на нуклеарната петорка“, изјави Песков.

Тој се осврна и на односите со Азербејџан, нагласувајќи дека Москва е запознаена со ставовите на азербејџанското раководство за Украина, но оти во тој поглед постојат извесни разлики. Сепак, Кремљ изрази надеж дека овие несогласувања нема да бидат пречка за затоплување на односите со Баку.