Швајцарска политичарка со потекло од БиХ се соочува со казна од 15.000 евра поради навреда на верски чувства
Швајцарското обвинителство во Цирих побара висока парична казна против 33-годишната политичарка Санија Амети, која минатата година објави фотографија на која пука во икона на Богородица со малиот Исус.
Обвинителството бара Амети да биде казнета со вкупна сума од 15.000 швајцарски франци – 10.000 и 2.500 франци казна и дополнителни 1.500 франци за судски трошоци. Случајот предизвика значајно внимание во швајцарската јавност поради сериозноста на делото и нејзиниот политички ангажман.
Според обвинението, Амети „јавно и навредливо ги исмејувала верувањата на другите во верски прашања, особено верата во Бог“, пренесува швајцарскиот дневен весник Blick.
Инцидентот се случил во септември минатата година, кога Амети на својот Instagram профил објавила фотографија од подрумот на нејзиниот дом, на која се гледа како пука во икона со ликот на Богородица и Исус. Иконата била погодена од повеќе од дваесет куршуми. Фотографијата подоцна била избришана, а Амети јавно се извинила.
„Тоа беше апсолутна глупост и неизмерно ми е жал“, изјавила таа, додавајќи дека ѝ требала видлива мета за вежбање пукање на 10 метри и дека случајно го избрала каталогот што го имала при рака.
„Не обрнав внимание на содржината на сликите. Тоа не беше исправно. Искрено жалам ако со тоа повредив некого“, додала Амети.
Случајот покрена нова дебата во Швајцарија за границите меѓу слободата на изразување и навредата на верските чувства, особено кога станува збор за јавни личности. Одлуката на судот се очекува наскоро.
