Центарот за управување со кризи информира дека во периодот од 21 до 22 јули 2025 година на територијата на државата се евидентирани вкупно 38 пожари на отворен простор. Од нив, шест се сè уште активни, пет се ставени под контрола, додека 27 се целосно изгаснати.
Меѓу активните пожари, најсериозни се оние што го зафатија поширокиот регион на Македонски Брод, каде што гори во селата Грешница, Локвица, Крапа и Латово. Се работи за пожари што опфаќаат деградирана дабова шума, грмушки, ниска вегетација и сува трева. Сериозна е и состојбата во општина Василево, Радовиш и Берово – каде што гори во селата Нивичино, Мал Готен и во пределот на Малешевските планини. Таму се зафатени нискостеблести шуми, смрека и густа ниска вегетација.
Активни се и пожари во Прилеп – поточно меѓу селата Штавица, Чумово, Волково и Прилепец, како и во Желино, каде што гори помеѓу селата Церово и Групчин.
Пожарите кои се под контрола се регистрирани во Ресен, Дојран, Велес, Гостивар и Прилеп. Најчесто се работи за запалена нискостеблеста или мешана шума, трска и ниска вегетација.
Во меѓувреме, успешно се изгаснати 27 пожари низ државата, најмногу од нив во Скопскиот, Пелагонискиот и Полошкиот регион. Се работи претежно за запалена сува трева, стрништа, грмушки, отпад или вегетација во близина на населени места, како што се селата Студеничани, Визбегово, Љубин, Трубарево, Тројаци, Горно Село, Дабиле, Прдејци, Оризари, Железница и други.
Надлежните апелираат до граѓаните да бидат исклучително внимателни при движење и престој во природа, особено во претпладневните и попладневните часови кога температурите се највисоки и опасноста од неконтролирано ширење на пожарите е значително зголемена.
Сите институции остануваат во состојба на зголемена подготвеност, а на терен се ангажирани припадници на противпожарните единици, шумската полиција и локалното население во координација со општинските штабови за заштита и спасување.
