Американската телевизија CNN објави ексклузивен извештај со архивски видео-снимки и фотографии на кои се гледа поранешниот претседател на САД, Доналд Трамп, во друштво со осудениот сексуален престапник Џефри Епстин. Станува збор за досега необјавени материјали што фрлаат ново светло врз нивната врска од 1990-тите години.
Меѓу објавените содржини се наоѓаат и фотографии од свадбата на Трамп со Марла Мејплс во 1993 година, одржана во хотелот Плаза во Њујорк, на кои се гледа присуството на Епстин. Исто така, CNN објави и видео-снимка од модна ревија на Victoria’s Secret од 1999 година, каде Трамп и Епстин се гледаат како разговараат и се смеат непосредно пред почетокот на настанот.
Оваа медиумска објава доаѓа во време кога се зголемува јавниот интерес и политичкиот притисок за појаснување на минатите релации помеѓу Трамп и Епстин. Американското Министерство за правда неодамна одлучи да ги задржи во тајност долгоочекуваните документи поврзани со истрагата за Епстин, што предизвика незадоволство дури и во редовите на поддржувачите на Трамповото движење „Да ја направиме Америка повторно голема“ (MAGA), кои очекуваа откривање на имињата на наводни соучесници.
На новинарско прашање од CNN за фотографиите од венчавката, Трамп наводно реагирал со зборовите: „Се шегувате?“ и веднаш потоа ја прекинал врската, нарекувајќи го медиумот „лажни вести“.
Се огласи и директорот за комуникации на Белата куќа, Стивен Чеунг, кој ги отфрли инсинуациите:
„Станува збор за извадени кадри од безопасни снимки и фотографии од јавни настани на кои присуствувале многу луѓе. Сега тие се злоупотребуваат на одвратен начин за ширење на мрачни претпоставки“, изјави Чеунг.
Инаку, Џефри Епстин беше пронајден мртов во затворска ќелија во Њујорк во август 2019 година, додека го очекуваше судењето по обвиненија за трговија со малолетни лица. Иако официјално е прогласено дека се самоубил, голем број теоретичари на заговор ја доведуваат во прашање таа верзија, повикувајќи се на неговите блиски врски со бројни влијателни личности од светот на политиката, бизнисот и шоу-бизнисот.
