Според најновите податоци од Центарот за управување со кризи, заклучно со 07:30 часот на 23 јули, на територијата на државата се регистрирани вкупно 37 пожари на отворен простор. Од нив, пет се активни, три се ставени под контрола, а 29 се целосно изгаснати.
Активните пожари се водат на повеќе локации, вклучително и во општините Василево, Радовиш и Берово, каде што гори низок шумски појас и грмушки на планината Голем Готен и Малешевските Планини. Сериозна е состојбата и во Македонски Брод, каде се бележат два пожара, како и во Прилеп и Желино, каде огнената стихија зафати шуми и ниска вегетација.
Пожарите под контрола се наоѓаат во Прилеп, Македонски Брод и во близина на тунелите кај Демир Капија, а најголемиот број изгаснати пожари се евидентирани во Куманово, Прилеп, Штип, Скопје, како и во Ресен, Кичево и други општини низ земјата.
Надлежните служби апелираат до граѓаните да бидат особено внимателни, да не палат оган на отворено и да ги пријавуваат веднаш сите сомнителни случаи на чад или пламен.
