Француски борбен авион „Мираж 2000“ се урна во Украина – пилотот се спасил
Борбениот авион „Мираж 2000“, кој Украина го доби од Франција, се урна во вторникот на територијата на западниот украински регион Волин поради технички дефект, соопшти украинската армија.
Станува збор за прв ваков инцидент со овој тип летало, откако Франција почна да ѝ испорачува „Миражи“ на Украина на почетокот од годинава.
„Поради дефект на опремата, пилотот веднаш ја информираше контролата на летот. Дејствуваше професионално, како што налагаат процедурите во итни ситуации, и успешно се катапултираше. Спасувачките служби го лоцираа и извлекоа во стабилна состојба. На земја нема жртви“, се наведува во соопштението објавено на каналот на украинската армија на Телеграм.
Според локалните медиуми, несреќата се случила во северозападниот дел на земјата, во близина на границата со Полска.
Првиот авион „Мираж 2000“ пристигна во Украина во февруари оваа година, како дел од пошироките напори на западните сојузници за модернизација на украинските воздухопловни сили, чие јадро сè уште го сочинуваат авиони од советско време. Пред тоа, Киев почна да прима и борбени авиони од типот Ф-16 од повеќе земји членки на НАТО.
Несреќата доаѓа во момент кога Украина се обидува да ги засили своите одбранбени капацитети на небото, особено во контекст на зголемените руски воздушни напади.
