Трамп со сомнежи за трошењето на американската помош: „Имам некоe чувство…“
Aмериканскиот претседател Доналд Трамп изрази сомнеж дека целата американска финансиска помош за Украина навистина била искористена за воена опрема. На состанок со републиканските конгресмени во Белата куќа, тој истакна дека дел од средствата можеби не завршиле таму каде што било предвидено.
„Бајден подели 350 милијарди долари во опрема или готовина. А знаете, полошо од опрема е токму готовината. Би било добро еден ден да дознаеме што точно се случи со тие пари, нели? Постојат индиции дека не секој долар завршил во опрема“, изјави Трамп, според американскиот медиум Fox News.
Сепак, тој додаде дека Украинците се бранат храбро и дека нивната одбрана ќе биде одржлива и понатаму, благодарение на тоа што земјите-членки на НАТО сега купуваат американско оружје.
„Нашите големи компании произведуваат најдобра воена опрема во светот, а сега ќе ја продаваат и користат. Дури и оние што се против војната, како мене, велат: Вау, ова не е лошо, ова е прилично добро. Така што, тие (Украинците) ќе можат да се одбранат. Ние повеќе нема да плаќаме за тоа – и мислам дека тоа е многу важно“, нагласи Трамп.
