Телата на 34-годишниот Ж.Д. и неговата двегодишна ќерка беа пронајдени во Голија, на околу 50 километри од Никшиќ, а според првичните информации од истрагата, станува збор за убиство и самоубиство, јавува порталот RTCG.
Според информациите од надлежните служби, сè започнало по семејна расправија меѓу Ж.Д. и неговата сопруга, по што тој со малолетната ќерка се оддалечил во непознат правец. Набргу потоа било поднесено известување за нивното исчезнување.
Полицијата веднаш започнала со активности за нивно лоцирање, а трагедијата ја пријавил таткото на Ж.Д., кој ги пронашол безживотните тела на својот син и внука. Случајот бил пријавен во полиција, по што на терен излегле екипи на полицијата и итната медицинска помош, кои само можеле да ја констатираат смртта на двете лица.
Според првичните наоди од истрагата, постои сомнение дека Ж.Д. ја убил својата двегодишна ќерка со огнено оружје, по што извршил самоубиство.
Истражните органи, предводени од државниот обвинител на Вишото јавно обвинителство во Подгорица, продолжуваат со прибирање докази и целосно расветлување на мотивите и околностите на овој трагичен настан.
