Во само неколку часови до пладне, брзата помош интервенирала поради шест колапси на јавни места, додека бројот на интервенции продолжува да расте во текот на топлите денови. Од медицинските служби упатуваат апел до постарите граѓани во најжешките часови да не излегуваат надвор за пазарење или други обврски, со цел да се заштитат од здравствени компликации.
„Колапсите се најчести кај оние што работат на отворено, а постарата популација најмалку ги почитува препораките, па тие се најчести пациенти на брзата помош“, вели д-р Даниел Ѓеоргиевски од брзата помош.
Температурите над 40 степени ќе продолжат до недела, а утре и во сабота се очекуваат и до 42 степени, додека од недела следува благо намалување на топлотниот бран, а од вторник се најавуваат дождови и грмежи, соопшти Управата за хидрометеоролошки работи (УХМР).
Од ЈП Водовод алармираат дека дневната потрошувачка на вода достигнува до 350 илјади кубни метри, што е еквивалентно на 140 олимписки базени, а проблемите со водоснабдувањето продолжуваат. Граѓаните се повикани да ја штедат водата и да избегнуваат неконтролирана потрошувачка.
