Патниците од земји надвор од Европската Унија, вклучувајќи ги САД, Обединетото Кралство, Канада, Австралија и други, од крајот на 2026 година ќе мора да платат 20 евра за ETIAS дозвола при влез во ЕУ, вклучувајќи ја и Хрватска.
Европската комисија го потврди новиот износ на таксата, која е речиси тројно повисока од првично планираните 7 евра. Средствата ќе се користат за покривање на оперативните трошоци на системот и неговото долгорочно одржување. ETIAS (Европски систем за патнички информации и одобрување) ќе биде задолжителен за граѓани од над 60 земји со моментално безвизен режим за Шенген-зоната.
Како ќе функционира?
Апликантите ќе треба да пополнат онлајн формулар со лични и патни податоци, како и безбедносни прашања. Повеќето барања ќе бидат автоматски одобрени за неколку минути, а во некои случаи ќе бидат подложени на дополнителна проверка.
Одобреното ETIAS ќе важи три години или до истекот на патниот документ – зависно што ќе настапи прво. Дозволата ќе ја проверуваат превозниците и граничните службеници пред и при влез во ЕУ.
Кој е ослободен?
Од таксата се изземени:
деца под 18 години, лица над 70 години, членови на семејства на граѓани на ЕУ, дипломатски персонал под одредени услови.
За кои земји важи?
ETIAS ќе се применува во сите земји членки на ЕУ (освен Ирска), Шенген-партнерите (Исланд, Норвешка, Швајцарија, Лихтенштајн), како и во Бугарија, Романија и Кипар, кога системот ќе биде целосно функционален.
Кога почнува?
ETIAS се очекува да стартува во последниот квартал на 2026 година, откако ќе помине двомесечен преглед во Европскиот парламент и Советот.
Системот е дел од пошироката стратегија за дигитална безбедност на границите на ЕУ, за подобро управување со миграцијата и спречување на безбедносни и здравствени закани уште пред доаѓањето на европска територија.
