Секторот за внатрешни работи Битола поднесе кривична пријава против А.П. (68) од Битола за сторено кривично дело „злоупотреба на службена положба и овластување“, како и против М.Д. (60) од Ресен за „злоупотреба на лични податоци“.
Според полицијата, А.П., во својство на директор на Јавната здравствена установа – Специјализирана болница Отешево, во периодот 2022–2023 година склучила три договори на дело со лице од Ресен за наводно ангажирање на градежни активности. Од нив, два договора самата ги потпишала, додека третиот бил потпишан од трето лице, иако ангажираното лице никогаш не било присутно ниту работело во установата.
И покрај тоа, А.П. со својот службен токен одобрила и потпишала налози за исплата во вкупен износ од 145.904 денари од жиро-сметката на установата, со што му нанела штета на Министерството за здравство.
Истовремено, М.Д., како правник и советник за човечки ресурси, ги изготвила трите договори на дело без согласност од лицето, искористувајќи ги неговите лични податоци и број на трансакциска сметка. Со тоа, преку исплата на средства за фиктивно извршени услуги, на болницата ѝ била нанесена материјална штета во истиот износ.
Против двете лица се води постапка за утврдување на кривична одговорност.
