Петок, 25 јули 2025 – Голема драма се случила во турското летувалиште Мугла, каде што според извештаи на турските медиуми, шефот на Чеченија и близок сојузник на Путин, Рамзан Кадиров, бил итно хоспитализиран откако за малку ќе се удавел.
Како што пренесува Kyiv Post, повикувајќи се на турски извори, инцидентот се случил во средата околу пладне, кога Кадиров, кој престојувал во хотел со пет ѕвезди, решил да се разлади и влегол во вода. Но, по само неколку минути почнал да се гуши и губи контрола над телото.
Сведоци велат дека вработените во хотелот веднаш реагирале, а спасувачи пристигнале на лице место и успеале да го извлечат Кадиров од базенот, при што му била укажана прва помош. Потоа, со возило на итна помош, тој бил префрлен во локална болница.
Иако засега нема официјална потврда од кабинетот на Кадиров, турски и украински медиуми јавуваат дека тој е надвор од животна опасност. Руските државни медиуми не објавиле ништо за инцидентот, што аналитичарите го толкуваат како обид на Кремљ да ја сокрие информацијата од јавноста, особено поради постојаните шпекулации за неговата здравствена состојба.
Некои извештаи сугерираат дека Кадиров боледува од некроза на панкреасот, сериозна болест со висока стапка на смртност. Сам Кадиров неодамна објави видео на Телеграм во кое тврди дека е „жив и здрав“, но негирањето доаѓа во време кога сè почесто се споменува можниот пренос на власта на неговиот син Адам, кој сè уште е малолетен. Другиот син, Ахмат Кадиров (18), веќе има две министерски функции во Чеченија.
Кадиров владее со Чеченија од 2007 година, но неговата власт е проследена со сериозни обвинувања за кршење на човековите права, тортура, и брутално гушење на опозицијата. Неговите единици, познати како „Кадировци“, активно учествуваат во војната во Украина на страната на Русија.
Доколку Кадиров почине, како што изјави проукраинскиот чеченски командант Абдул Хаким, тоа би било „голема радост за чеченскиот народ“ и можен почеток на, како што вели, ослободување на Чеченија од стегите на Москва.
Инцидентот во Турција дополнително ги подгрева шпекулациите околу иднината на чеченскиот лидер и судбината на регионот што долго време е под неговата цврста контрола.
