Република

Шест активни пожари беснеат низ Македонија – под закана шуми и села, најкритично е во на овие места

Високите температури и сувата вегетација го направија денот 25 јули 2025 година еден од најкритичните досега – со шест активни пожари низ државата, од кои некои сериозно се закануваат на населени места.

Според последните информации од Центарот за управување со кризи, до 13:00 часот евидентирани се вкупно 14 пожари на отворен простор, од кои шест се активни и надвор од контрола, четири се ставени под контрола, а уште четири се целосно изгаснати.

Најопасна е ситуацијата во југоисточниот и источниот дел на земјата. Во општина Василево пожарот кој почнал кај селото Нивичино се проширил кон планинските предели Голем Готен и Малешевските Планини, уништувајќи голема површина од густа шума. Гаснењето е силно отежнато поради непристапниот терен и силниот ветер.

Во Прилеп огнот беснее кај селото Бешиште, а се шири и кон Градешница. Таму гори мешана шума, а пожарникарите се борат со пламени јазици кои брзо се движат поради ветерот.

Пожари се активни и кај Македонски Брод – меѓу селата Црешнево и Грешница, како и во Штип, меѓу селата Драгоево и Селце. Во Карбинци пожар избувнал кај Јунузлија, а во Зелениково гори кај селото Гумалево.

Добра вест е што дел од пожарите се ставени под контрола. Во Прилеп, кај Царевиќ и Смолани, како и два пожари кај Македонски Брод се стабилизирани. Исто така, контролирана е ситуацијата и во Желино.

Целосно изгаснати се четири пожари: во Ресен, кај селото Долно Перово, двата пожара во Кочани, како и пожарот кај селото Латово во Македонски Брод.

Состојбата останува алармантна. Надлежните апелираат граѓаните да бидат максимално внимателни, да не палат оган на отворено и да пријават секој забележан пожар. Секоја искра може да биде кобна.

Република

Четири тетовски села утре ќе бидат без струја

Дел од тетовските села Цепчиште, Јажинце, Доброште и Слатино утре, 23 декември 2025 година, ќе бидат без електрична енергија поради планирани прекини во дистрибутивната мрежа.

Според најавата, прекинот ќе трае од 09:00 до 14:00 часот. Во селото Џепчиште без струја ќе останат објекти кои се наоѓаат кон центарот на селото, додека во Јажинце прекинот ќе ги зафати објектите во близина на џамијата. Во Доброште и Слатино без напојување ќе бидат делови од селата, согласно планираните активности.

Од надлежните апелираат граѓаните навреме да ги планираат своите обврски и да преземат потребни мерки за време на прекинот.

Република

Хумана новогодишна акција: Дедо Мраз пристигна на мотор кај децата од „Кочо Рацин“ во Битола

Моторџиите од МК Конзули Битола денеска организираа хумана новогодишна посета во Ресурсниот центар Кочо Рацин во Битола, носејќи го Дедо Мраз на мотор за да им подели пакетчиња на децата.

Настанот помина во празнична атмосфера, исполнета со детска радост, насмевки и искрена возбуда. Од МК „Конзули“ истакнаа дека ваквите моменти се потсетник на вистинската смисла на празниците – хуманост, споделување и грижа за најмладите.

Тие упатија благодарност до вработените во ресурсниот центар за топлиот пречек и посветеноста што секојдневно ја вложуваат во грижата и образованието на децата, најавувајќи дека и во иднина ќе продолжат со вакви хуманитарни активности.

Извор: Апла.мк

Република

Проданоски: Наставата на мајчин турски јазик е темел на културниот идентитет и соживотот

По повод Денот на наставата на турски јазик, градоначалникот на Општина Прилеп, Дејан Проданоски, упати искрени честитки до сите наставници, ученици и образовни работници кои ја негуваат и унапредуваат наставата на мајчин турски јазик.

Тој упати посебни честитки до колективот и учениците од ООУ „Св. Кирил и Методиј“ во село Канатларци, каде што успешно се реализира настава на турски јазик и со голема посветеност се негува јазикот како значаен дел од културниот идентитет.

Проданоски ја истакна важноста од негувањето на мајчиниот јазик и почитувањето на повеќекултурните вредности, нагласувајќи дека мајчиниот јазик е нераскинлив дел од идентитетот, традицијата и културното наследство на секој народ, а неговото почитување придонесува за меѓусебно разбирање, почит и пријателство во мултикултурно општество.

Општина Прилеп, како што беше нагласено, ќе продолжи посветено да ги негува повеќекултурните вредности и да го чува културниот идентитет на сите заедници, вклучително и на турската заедница, со цел создавање подобри услови за изучување и унапредување на наставата на мајчин турски јазик.