Најмалку 50.000 функционери од иранската влада и војска се регистрирале на безбедна платформа создадена за координација на соборувањето на диктатурата во Техеран, тврди прогонетиот принц Реза Пахлави, син на последниот ирански шах симнат од власт во Исламската револуција во 1979 година.
Платформата, најавена пред еден месец, е наменета за префрлање на лојалисти на режимот во опозицискиот камп, со можност да добиваат информации за тактики и стратегии на отпорот. Во интервју за Politico, Пахлави истакнува дека бројките сè уште се верификуваат, но дека неговиот тим веќе воспоставува контакти со клучни луѓе во армијата, паравоените единици и безбедносните служби — за кои вели дека можат да бидат одлучувачки фактор во соборувањето на врховниот лидер Али Хамнеи и создавање на нова, секуларна држава.
„Станува збор за десетици илјади. Последната проценка е најмалку 50.000, а можеби и повеќе“, изјави Пахлави. „Секоја недела има нови пријави. Процесот на верификација е напорен и ќе трае, но сигналите се исклучително силни. Посветено работиме со приоритет на клучните луѓе во системот.“
Најава за нова платформа и конференција во Минхен
Пахлави најави и нова веб-страница преку која обични граѓани од Иран ќе можат да се приклучат на националната кампања против режимот. Ова го најави во пресрет на голема опозициска конференција во Минхен, каде ќе присуствуваат најмалку 500 противници на режимот — вклучувајќи активисти, уметници и спортисти. Тој тврди дека ова ќе биде едно од најразновидните собирања на иранската опозиција надвор од земјата од 1979 година наваму.
Пахлави се нуди како лидер на транзицијата кон демократија, ако Исламската Република падне. Но, неговите критичари забележуваат дека во 46-те години егзил не успеал да ги обедини различните фракции на иранската опозиција. Некои сметаат дека како наследник на поранешна монархија, не е соодветна личност да ја преземе власта.
„Целта е да покажеме дека, повеќе од кога било, постои растечка коалиција на истомисленици кои сакаат да соработуваат. Тоа е многу разновидна група, можеби и најголема досега, која ги претставува сите фракции на иранската политичка сцена“, порача Пахлави.
Сите учесници на т.н. Национална конвенција за соработка поддржуваат три главни принципи: зачувување на територијалниот интегритет на Иран, заштита на индивидуалните слободи и еднаквост на сите граѓани, и строга поделба меѓу религијата и државата.
Предупредување за иранските нуклеарни преговори
Пахлави се осврна и на нуклеарните преговори што ги води Иран, предупредувајќи дека режимот во Техеран „со преговорите само купува време“ и не треба да му се верува.
