Црна Хроника

СЕ ПРЕТСТАВИЛ КАКО ДИПЛОМАТ И ВРАБОТЕН ВО МВР – ПАДНА НА ГРАНИЦА СО ФАЛСИФИКАТИ И „ТАЈНИ“ ДОКУМЕНТИ!

Сериозен инцидент се случил вчера на граничниот премин Табановце, кога двајца мажи од Скопје се обиделе да влезат во државата со лажни идентитети и сомнителни документи. Полициските службеници ги привеле С.С. (59) и Б.А. (55) поради сомнение за фалсификување исправи и обид за злоупотреба на службени овластувања.

С.С., кој управувал патничко возило „Голф“ со скопски регистарски таблички, им се претставил на припадниците на ФРОНТЕКС како дипломат, приложувајќи патна исправа наводно издадена од „Европски полициски комитет“. Истовремено, на македонските граничари тврдел дека е вработен во МВР, иако не поседувал службена легитимација.

Дополнителната контрола открила вистинска мини-фабрика за фалсификати: неколку патни исправи, биометриска страница за пасош, два пластични печати, четири лични карти и други сомнителни документи биле пронајдени во возилото.

Двајцата се приведени, предметите се одземени, а истрагата е во тек. По нејзиното завршување, ќе следуваат кривични пријави за сторено кривично дело „фалсификување исправа“. Властите најавуваат дека ќе се испитува и дали зад случајот стои поголема мрежа за изработка и дистрибуција на лажни документи.

Црна Хроника

Тетово: Физички напад во угостителски објект, едно лице повредено со тврд предмет

СВР Тетово поднесе кривична пријава против Р.У.(18) од с.Желино и 16-годишник од с.Групчин поради постоење основи на сомнение за сторено кривично дело „насилство“.

На 22.10.2025, во еден угостителски објект во Тетово, пријавените физички ги нападнале А.Р.(19) од тетовско и 15-годишник од тетовско. При нападот, првопријавениот употребил и тврд предмет, при што е причинета повреда.

Случајот е пријавен и се преземаат мерки за целосно расчистување на инцидентот.

Црна Хроника

Измама со „волшебна амајлија“: Жената оштетена за 60.000 денари

Жена од Делчево била измамена со ветување дека „амајлија“ ќе ги реши сите нејзини семејни проблеми, при што издала 60.000 денари. Полицијата поднесе кривична пријава против 61-годишниот С.Ѓ. од скопското село Сарај поради измама.

Измамникот ја убедил жртвата во моќта на своите услуги во два наврати – во септември 2024 и повторно во март 2025 година, земајќи ѝ по 30.000 денари секојпат. Откако сфатила дека е измамена, жената го пријавила случајот во полиција.

Од МВР соопштуваат дека С.Ѓ. се сомничи за кривичното дело „измама“ и дека против него е поднесена соодветна кривична пријава.

Црна Хроника

Инцидент во Скопје – две возила попречиле пат, следел напад

Вчера во 10:40 часот во СВР Скопје, С.М.(47) од Скопје пријави дека додека се движел со патничко возило од с.Јурумлери, скопско кон населбата Драчево, две возила му го попречиле патот, а од нив излегле М.С. и уште неколку други лица и физички го нападнале, а употребиле и тврди предмети, при што му го оштетиле и возилото.

Се преземаат мерки за расчистување на случајот.