Американскиот претседател Доналд Трамп пристигна во Шкотска на четиридневна посета која вклучува играње голф, билатерални средби и разговори со европски функционери. По пристигнувањето, тој го пофали британскиот премиер Кир Стармер, нарекувајќи го „добар човек“ со „поиберални ставови“, и истакна дека новиот трговски договор помеѓу САД и Обединетото Кралство — кој стапи на сила минатиот месец — е „добра зделка“. Главна тема на разговорите се потенцијални амандмани на тој договор.
Трамп остро ја критикуваше илегалната миграција, нарекувајќи ја „ужасна инвазија што ја убива Европа“ и апелираше до европските лидери „да се соземат“, во спротивно, како што рече, „ќе ја изгубат Европа“. Тој тврди дека во САД „во последниот месец не влегол ниту еден илегален мигрант“. Особено ги критикуваше ветерните турбини, нарекувајќи ги штетни за природниот пејзаж и за птиците.
По слетувањето, Трамп се упати кон својот голф терен во Тернбери, а планира да го посети и имотот во Абердиншир, за чиј развој, според него, помогнал легендарниот шкотски актер Шон Конери. Планирани се и средби со шкотскиот премиер Џон Свини и со претседателката на Европската комисија, Урсула фон дер Лајен. Во однос на можниот трговски договор со ЕУ, Трамп оцени дека шансите се „педесет-педесет“, со напомена дека постојат околу „дваесет спорни точки“.
На новинарско прашање за случајот со Џефри Епштајн, Трамп одби да навлегува во детали, нагласувајќи дека е фокусиран на деловни договори, а не на, како што рече, „теории на заговор“. За можноста за помилување на Гислејн Максвел, која беше осудена заедно со Епштајн, изјави дека „сега не е време за таква дискусија“.
Пристигнувањето на Трамп беше дочекано со протести, организирани меѓу другото и од групата „Стоп за Трамп Шкотска“, со демонстрации планирани во неколку шкотски градови. Анкетите покажуваат висок степен на недоверба кон него — околу 70% од Шкотите имаат негативно мислење за Трамп.
Јавноста исто така критикува и за трошоците поврзани со неговата посета. Се потсетува дека за време на неговата посета во 2018 година биле потрошени над 14 милиони фунти од буџетот за полициско обезбедување, од кои повеќе од 3 милиони само за голф-теренот Тернбери. Шкотската полиција најави дека и оваа операција ќе биде „значајна“ и дека вклучува ресурси од цела држава, додека полицискиот синдикат предупредува дека толкавиот распоред има последици врз нивната секојдневна работа, и покрај тврдењата на шкотскиот премиер дека посетата нема да влијае врз редовното функционирање на полицијата.
