Економија

ВЛЕН со 99,7 милиони денари директна поддршка за 1.865 земјоделци – визијата станува реалност

Заменик-министерот за земјоделство, Албрим Хоџа, го најави последниот чекор на Владата под водство на ВЛЕН – исплата на 99,7 милиони денари директна финансиска поддршка на 1.865 земјоделци од цела Северна Македонија, како дел од Програмата за финансиска поддршка за 2024 година.

Овој потег е поздравен како една од најзначајните и најдиректни инвестиции во земјоделството, која ја одразува суштината на програмската филозофија на ВЛЕН: правична застапеност, рамномерен развој и економско достоинство за секој граѓанин.

„Оваа поддршка не е само бројка – таа е конкретен доказ дека државата стои зад земјоделците. Ја јакнеме довербата во институциите и го поддржуваме локалното производство, отвораме ново поглавје за модерно, заштитено и конкурентно албанско земјоделство“, истакна Хоџа.

Од ВЛЕН порачуваат дека ова е само почеток на подлабоки системски промени, кои преку инклузивни политики и одговорен институционален пристап ја трансформираат секојдневната реалност на земјоделците во стабилна економска иднина.

„За земјоделство што вреди, за држава што претставува“ – порачуваат од ВЛЕН.

Економија

Хрватска ги менува правилата за странски работници – еве колку дозволи има за Македонците

Хрватска воведува нови услови за вработување на странски државјани со цел подобра контрола, намалување на нелојалната конкуренција и спречување на нелегалните практики. Измените на Законот за странци воведуваат построги здравствени критериуми и барање за познавање на хрватскиот јазик, информира ХРТ.

Граѓанин на трета земја, како Македонија, за прва дозвола за привремен престој ќе мора да приложи потврда за здравствена состојба и статус на вакцинација, кои не смеат да бидат постари од 90 дена. Исто така, познавањето на хрватскиот јазик се смета за основа за интеграција на странските работници, а државниот секретар Иван Видиш посочи дека и покрај кофинансираното учење јазици од Европскиот социјален фонд, интересот кај работниците е слаб.

Хрватска годинава издаде над 11.000 работни дозволи за граѓани од Македонија. Премиерот Андреј Пленковиќ истакна дека во последните две години се создадени 100.000 нови работни места, а бројот на невработени паднал на 81.000, што го покажува ефектот од активната политика за вработување.

Министерот за труд Марин Пилетиќ додаде дека во земјата моментално има околу 140.000 странски работници, а измените на законот ќе го намалат бројот на нови дозволи, додека ќе се зголеми значењето на оние кои веќе се наоѓаат во Хрватска.

Претседателот на GSV, Иван Мишетиќ, посочи дека во наредните пет години ќе бидат потребни над 100.000 работници од странство поради планираниот раст и пензионирањата, бидејќи домашниот пазар не може да го задоволи овој раст.

Економија

Од вечерва нова цена на дизелот

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши намалување на малопродажните цени на нафтените деривати во просек за 0,60% во однос на одлуката од 18.12.2025 година.

Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 1,631%, кај дизелот за 4,633%, кај екстра лесното масло за 3,987% и кај мазутот зголемувањето е за 0,223%. Курсот на денарот во однос на доларот во изминатиот период по кој беа формирани цените со претходната пресметка е понизок за 0,1645%.

Од 20.12.2025 година од 00:01 часот максималните цени на нафтените деривати ќе изнесуваат:

– Моторен бензин ЕУРОСУПЕР БС – 95 71,00 (денари/литар);
– Моторен бензин ЕУРОСУПЕР БС – 98 73,00 (денари/литар);
– Дизел гориво ЕУРОДИЗЕЛ БС (Д-Е V) 64,50 (денари/литар);
– Масло за горење Екстра лесно 1 (ЕЛ-1) 65,50 (денари/литар);
– Мазут М-1 НС 32,635 (денари/килограм).

Малопродажната цена на ЕУРОДИЗЕЛ (Д-Е V) се намалува за 2,00 ден/лит. Малопродажните цени на бензините ЕУРОСУПЕР БС-95 и ЕУРОСУПЕР БС-98, како и на Екстра лесното масло за домаќинство на (ЕЛ-1) и на Мазутот М-1 НС не се менуваат.

Економија

Димитриеска-Кочоска: Со поддршка од САД ги унапредуваме буџетските процеси и јавните финансии

Министерката за финансии Гордана Димитриеска-Кочоска одржа работен состанок со Џејсон Винички, заменик-директор за буџет и финансиска одговорност во Канцеларијата за техничка помош (OTA) при Трезорот на САД, на кој беа разгледани активности за унапредување на буџетските процеси и јакнење на системот на јавни финансии.

На состанокот беше истакнато дека со поддршка од Трезорот на САД и Канцеларијата за техничка помош (OTA), Министерството за финансии интензивно работи на подобрување на буџетското планирање, извршувањето на буџетот и управувањето со јавните финансии, со цел зголемена транспарентност, ефикасност и отчетност.

Димитриеска-Кочоска нагласи дека соработката со Канцеларијата за техничка помош (OTA) е од суштинско значење за градење модерен и одржлив систем на јавни финансии, кој ќе обезбеди подобро управување со јавните средства и поддршка на економскиот развој на државата.