Балкан

Балканот во пламен: Пожари ја голтаат Бурса, Атина, Евија и Струмјани — активиран Европскиот механизам за помош

Разорни пожари предизвикани од екстремни температури, суво време и силни ветрови го зафатија Балканот, при што Турција, Грција и Бугарија се соочуваат со сериозна еколошка и хуманитарна криза.

Во Турција, пожарите се доближуваат до Бурса, четвртиот по големина град во земјата. Над 1.700 луѓе се евакуирани, автопатот Бурса–Анкара е затворен, а гувернерот предупреди дека огнот се шири неконтролирано по шумските планински предели. Загина еден пожарникар, а надлежните пријавуваат 76 активни пожари во различни региони. Во провинцијата Сирнак, измерени се рекордни 50,5 °C.

Слична е ситуацијата и во Грција, каде што се борат со пет големи пожари, особено во регионот Атика и на островите Евија и Китира. Властите евакуираа население од подрачја блиску до Атина, а чадот веќе го покрива центарот на градот. Шестмина пожарникари се повредени, а грчкиот министер за климатска криза и цивилна заштита, Јанис Кефалојанис, изјави дека се уништени домови и огромни шумски површини.

Во Бугарија, пожарот кај Струмјани е вон контрола. Премиерот Росен Жељазков соопшти дека земјата побарала и добила поддршка од ЕУ преку Европскиот механизам за цивилна заштита. Очекувана е помош од Чешка, Унгарија, Словачка, Франција и Шведска, со авиони и хеликоптери за гаснење од воздух, како и вклучување на 50 припадници на бугарската војска.

Целокупната слика на Балканот го потврдува растечкиот ризик од климатските промени и недоволната подготвеност на земјите да се справат со сè поекстремните временски услови. Европската солидарност е активирана, но гаснењето на огнената стихија останува трка со времето.

Балкан

Повторно блокиран патот кон ЕУ на Црна Гора – Ова се причините

Франција стави блокада на затворањето на две поглавја во пристапните преговори на Црна Гора со Европската Унија, но дипломатски извори од Брисел потврдуваат дека Подгорица следната недела ќе успее да затвори три други поглавја.

Според информации на TVCG, Црна Гора е подготвена да ги затвори поглавјата: Право на основање компанија и слобода на обезбедување услуги (3), Слободно движење на капитал (4) и Право на деловните друштва (6). Меѓувладината конференција, на која се очекува официјалното затворање, е закажана за 16 декември, пред седницата на Советот на министри за општи работи на ЕУ.

Сепак, Франција се спротивставила на затворањето на поглавјата Земјоделство и рурален развој (11) и Рибарство (13). И покрај последните консултации, тие две поглавја остануваат отворени, што го одложува напредокот во овие области.

Дипломатски извори информираат дека постојаните претставници на земјите-членки ќе се состанат повторно за време на викендот, со можност за дополнителни разговори и потенцијално затворање на уште некои поглавја пред конференцијата.

Црна Гора ги започна преговорите со ЕУ на 29 јуни 2012 година, откако статусот кандидат го доби во 2010 година. Досега ги има отворено сите поглавја и неколку привремено затворени, задржувајќи ја позицијата како најнапредната земја на Западен Балкан во процесот на европска интеграција.

Балкан

Брисел притиска: Албанија мора да врати 33,5 милиони евра по откриените злоупотреби со ИПАРД фондовите

Европската Унија официјално побара од Албанија да врати 33,5 милиони евра од програмата ИПАРД 2, по утврдените нерегуларности во користењето на средствата во периодот 2020–2022 година, објави „Лајме јаворе“. Одлуката доаѓа по деталната истрага на Европската канцеларија за борба против измами (OLAF), која идентификувала 52 случаи на злоупотреба на фондови наменети за албанските земјоделци и агро-прехранбениот сектор.

Во изјава за А2 CNN, Европската комисија била јасна: секој евроцент што бил искористен нерегуларно мора да биде вратен, нагласувајќи дека Тирана мора со „најголема сериозност“ да пристапи кон проблемот.

Локалните медиуми предупредуваат дека Албанија е најлошо рангирана во регионот по злоупотребени средства, дури полошо и од Турција. Дополнителен удар е суспензијата на финансирањето од ИПАРД 3 – вкупно 146 милиони евра, од кои 112 милиони се средства од Европската Унија. Доколку владата не спроведе корективни мерки, ризикува целосно губење на средствата до 2027 година.

Европската комисија потврдува дека е во тек билатерална постапка за да се утврди дали албанските институции ќе успеат да ја повратат довербата во системот.

Паралелно, предметот го отвори и албанското Специјално обвинителство за корупција и организиран криминал (СПАК), кое истражува како биле распределувани средствата, кој бил корисник, и кои институции или поединци стојат зад злоупотребите.

Балкан

„Илинден“-Тирана му посакува успешен мандат на Клодиан Брахо и бара истрага за злоупотребите со бугарско потекло

Македонско друштво “Илинден“-Тирана му посакува на г-дин Клодиан Брахо, кој беше избран за нов раководител на Специјалната структура против корупција и организиран криминал (СПАК).

Македонско друштво “Илинден“-Тирана очекува СПАК со приоритет да го истражи незаконското издавање на уверенија за бугарско потекло од албанските локални институции, како и влијанието што групите посредници за бугарски пасоши го извршија врз процесот на пописот во 2023 година на целата територија на Република Албанија.

Овие групи ја злоупотребија својата моќ и врски за да постават свои попишувачи, при што вршеа притисоци, закани и поткуп врз албанските граѓани со цел да ги принудат да се изјаснат како Бугари и да ги манипулираат податоците од пописот.

Дополнително, бараме истрага за незаконските активности на фондациите од Бугарија, кои делуваат со цел асимилација на автохтоната македонска заедница во Република Албанија, загрозувајќи го нејзиниот идентитет, култура и права.

Македонско друштво “Илинден“-Тирана честита за достигнувања на СПАК во текот на последните три години под водство на г-дин Алтин Думани, надевајќи се дека понатамошната работа на г-дин Клодиан Брахо ќе биде успешна и во служба на транспарентноста и правдата.

Македонско друштво “Илинден“-Тирана