Во Инфо-центарот на Пониква денеска се одржа работен состанок меѓу градоначалниците на општините Кочани и Пробиштип, Владко Грозданов и Тони Тоневски, посветен на унапредување на туристичкиот развој и поефикасно искористување на потенцијалите на оваа планинска дестинација.

На состанокот беше ставен акцент на богатите природни ресурси на Пониква, кои претставуваат цврста основа за развој на зимски и планински туризам. Посебно внимание беше посветено на можностите за развој на ски-туризмот, како важен сегмент за зголемување на бројот на посетители во зимскиот период и за продолжување на туристичката сезона во текот на целата година.

Целта на средбата беше унапредување на меѓуопштинската соработка преку координиран и одржлив пристап во решавањето на предизвиците поврзани со развојот на Пониква. Градоначалниците нагласија дека заедничкото делување ќе овозможи подобро планирање на инвестициите, подобрување на инфраструктурата и пристапноста, како и реализација на значајни капитални проекти.

Во таа насока, беше истакната и заедничката подготвеност за координиран настап пред домашни и меѓународни фондови, со цел обезбедување финансиска поддршка за проекти што ќе придонесат за целосно валоризирање на природните потенцијали на Пониква и нејзино позиционирање како препознатлива туристичка дестинација во регионот.

Општина Кичево ги објави долгочекуваните детали за дводневната програма со која ќе се одбележи дочекот на Новата 2026 година на градскиот плоштад, понудена со цел да ги обедини сите жители и гости во празнична атмосфера. Градоначалникот Д-р Александар Јовановски ја истакна позитивната енергија и богатството на настаните, кои ќе понудат забава и музика за сите генерации.

Празничните случувања започнуваат на 30 декември во 12:30 часот со настапи на локални играорни групи составени од учесници од различни етнички заедници, со што се нагласува културната разновидност и заедништво во Кичево. 

На 31 декември програмата е посветена на најмладите: од 11:30 часот ќе следува детска новогодишна забава со настапи на „Академија Кристина“ и дуетот „Биби и Боби“, а кулминацијата ќе биде пристигнувањето на Дедо Мраз, кој ќе им подели пакетчиња на децата од градските градинки.

Во вечерните часови на 31 декември, со почеток во 20:00 часот, започнува големата музичка програма што ќе донесе празнична атмосфера и забава за сите генерации. На сцената се најавени настапи на повеќе музички имиња, меѓу кои се Ани Малинкова, Елвис Зенкоски, Јасмин Хусоски, Дарко Стојаноски, Дамјан Стојаноски, Сузана Спасовска, Rozafa Etemi & Black Jack, како и групите Љубојна, Фолтин, Addicted Band, Phoenix Band и Future Band.
Граѓаните се поканети да се приклучат на прославата, да уживаат во музиката, заедништвото и празничната атмосфера и заедно да ја дочекаат Новата 2026 година.

Општина Битола и Спортскиот клуб „Специјална олимпијада – Битола“ потпишаа Меморандум за соработка со кој се воспоставува стратешка, долгорочна и одржлива соработка насочена кон развој на спортските активности и инклузијата на лица со интелектуални попречености.

Меморандумот го потпиша градоначалникот Тони Коњановски, со што општината се обврзува да обезбеди институционална, логистичка и организациска поддршка за активностите и настаните на клубот, користење на спортски објекти согласно условите и процедурите, поддршка во промоција на инклузивни спортски програми и јавни кампањи, како и соработка во развој на локални инклузивни политики и иницијативи.

Спортскиот клуб „Специјална олимпијада – Битола“, предводен од претседателката Ана Котевска, ќе реализира спортски тренинзи и програми согласно стандардите на „Специјална олимпијада“, ќе ја информира навремено општината за планираните активности од заеднички интерес и ќе работи на вклучување на лица со интелектуални попречености во спортски програми и натпревари, во соработка со општински институции, училишта и спортски субјекти.

Меморандумот се склучува на период од четири години, со можност за продолжување, и предвидува заедничка организација на спортски манифестации, фестивали и јавни настани, промоција на инклузивни вредности и подигање на јавната свест, поддршка за тренери и волонтери, како и создавање услови за одржлив развој на програмите на „Специјална олимпијада“ во Битола.