Премиерот Христијан Мицкоски на Македонскиот фолклорен фестивал Преспа во Општина Пустец, Албанија, порача дека Пустец е жив доказ дека припадноста не се брише и дека коренот останува дури и кога дуваат силни ветрови. Тој истакна дека постојат луѓе кои не чекаат благодарност, туку само можност да продолжат да ја негуваат својата култура и идентитет, дури и кога другите би се откажале.
„Ви благодарам што ја носите таа тишина исполнета со сила. Ви благодарам што останавте свои. И ви ветувам, оваа држава ќе знае да ви возврати со почит, со работа и со постојана поддршка“, порача Мицкоски пред жителите на Пустец и Мала Преспа.
Тој нагласи дека Македонците во Албанија се лојални граѓани на оваа држава, но истовремено со гордост го чуваат својот мајчин јазик, кој е посебен и различен од другите балкански јазици. „Ние не сме ниту Грци, ниту Бугари, ниту Срби, туку сме Македонци, во Албанија и насекаде во светот“, потенцираше премиерот.
Мицкоски додаде дека за македонската заедница во Пустец и Мала Преспа важи посебно чувство на припадност кое не се менува со менување на границите, политиките или времето. „Вие сте синоними за истрајност, за тивка лојалност, за достоинство и скромност. Останавте тоа што сте, и останавте лојални на државата во која живеете“, рече тој.
Премиерот посочи дека Владата има обврска да ја поддржува македонската заедница во Албанија преку образование, култура, економски развој и прекугранична соработка, и тоа не како милост, туку како исправна политика. Тој посака младите да пораснат со чувство на припадност и самодоверба, и увери дека оваа посета е само почеток на долгорочна соработка и поддршка.
„Ова не е граница – ова е врска. Ова не е далечина – ова е блискост. Ова не е фуснота во нечиј извештај – ова е глава во нашата национална приказна“, заврши Мицкоски.
