Општина Битола и Спортскиот клуб „Специјална олимпијада – Битола“ потпишаа Меморандум за соработка со кој се воспоставува стратешка, долгорочна и одржлива соработка насочена кон развој на спортските активности и инклузијата на лица со интелектуални попречености.

Меморандумот го потпиша градоначалникот Тони Коњановски, со што општината се обврзува да обезбеди институционална, логистичка и организациска поддршка за активностите и настаните на клубот, користење на спортски објекти согласно условите и процедурите, поддршка во промоција на инклузивни спортски програми и јавни кампањи, како и соработка во развој на локални инклузивни политики и иницијативи.

Спортскиот клуб „Специјална олимпијада – Битола“, предводен од претседателката Ана Котевска, ќе реализира спортски тренинзи и програми согласно стандардите на „Специјална олимпијада“, ќе ја информира навремено општината за планираните активности од заеднички интерес и ќе работи на вклучување на лица со интелектуални попречености во спортски програми и натпревари, во соработка со општински институции, училишта и спортски субјекти.

Меморандумот се склучува на период од четири години, со можност за продолжување, и предвидува заедничка организација на спортски манифестации, фестивали и јавни настани, промоција на инклузивни вредности и подигање на јавната свест, поддршка за тренери и волонтери, како и создавање услови за одржлив развој на програмите на „Специјална олимпијада“ во Битола.

Со приближувањето на празничните денови и традиционалните предновогодишни и новогодишни прослави, Дирекцијата за заштита и спасување (ДЗС) упатува силен апел до сопствениците и организаторите на настани: безбедноста на посетителите не смее да се занемари.

Од ДЗС потсетуваат дека секој угостителски објект мора да ги почитува пропишаните мерки за заштита од пожари, како и да обезбеди брза и сигурна евакуација во случај на итни ситуации. Коридорите и излезните патишта треба постојано да бидат чисти и проодни, а излезните врати за евакуација – отклучени и функционални.

Посебен акцент се става и на противпожарната опрема: таа мора да биде исправна, достапна и редовно одржувана. Забранета е употребата на пиротехника и отворен пламен во затворени простории, како и другите опасни материјали кои можат да го загрозат животот и здравјето на посетителите.

ДЗС исто така нагласува дека капацитетот на објектите мора строго да се почитува, а персоналот да биде добро информиран и подготвен да реагира при било каква опасност.

„Нашата цел е превенција и заштита – како на граѓаните, така и на материјалните добра. Апелираме до сите организатори да постапуваат одговорно и да ги почитуваат законските регулативи“, велат од ДЗС.

Јавното претпријатие „Водовод“ Битола во 2026 година планира реализација на повеќе од 14 проекти, со вкупна вредност од околу 65 милиони денари, со цел зголемување на приходите и постепено намалување на финансиската загуба.

Директорот на претпријатието, Андреј Гинов, информира дека 2024 година „Водовод“ ја завршил со загуба од 61 милион денари. Вкупните приходи изнесувале 284 милиони денари, додека расходите достигнале 346 милиони денари. Од наплата на вода од правни и физички лица биле остварени 262 милиони денари, а од останати активности околу 22 милиони денари.

Најголем дел од расходите, како што појаснува Гинов, се однесуваат на електричната енергија, сирова вода и платите. Само за електрична енергија биле потрошени 43 милиони денари, за сирова вода кон хидро-системот „Стрежево“ 50 милиони денари, а за плати 148 милиони денари. Со вклучен ДДВ, овие три ставки достигнуваат околу 280 милиони денари, што е речиси целокупниот приход на претпријатието, и покрај високата наплата на сметки од околу 95 проценти.

Гинов направи споредба и со претходните години, нагласувајќи дека во 2021 година „Водовод“ имал 227 вработени со трошок за плати од 107 милиони денари, додека во 2024 година со 205 вработени, трошокот за плати изнесувал 148 милиони денари. Во 2025 година, поради зголемувањето на минималната плата, овој трошок се искачил на 158 милиони денари. Според него, во периодот од 2019 до 2025 година, бруто-платите се зголемиле за 62 милиони денари.

Како главни причини за загубата се посочуваат високата цена на електричната енергија, зголемените трошоци за сирова вода од „Стрежево“, како и поскапувањето на репроматеријалите. За надминување на овие предизвици, во 2025 година, во соработка со Општина Битола, биле изградени над 7 километри нова водоводна мрежа, во вредност од 40 милиони денари.

Во насока на намалување на трошоците, „Водовод“ изработил проект за поставување фотоволтаици и аплицирал со проект поддржан од Швајцарската амбасада, за инсталација на соларни панели на објектите во стопанскиот двор, со што значително ќе се намалат трошоците за електрична енергија.

Паралелно, подготвен е и проект за нов потисен цевковод, кој ќе овозможи зголемено испумпување вода од хидро-системот „Стрежево“ во летниот период. Со замената на постојниот цевковод Ф700 со нов Ф800, ќе се подобри притисокот на водата, ќе се намалат загубите и ќе се обезбеди стабилно водоснабдување на градот во наредните 50 години.

Минатата недела во Битола беше одржана и панел-дискусија посветена на подобрување на услугите што јавните претпријатија им ги нудат на граѓаните, на која беа отворени прашања за финансиската одржливост и ефикасноста на јавниот сектор.