По неколку месеци без пристап до суштинска помош, денеска во Појасот Газа влезе голем хуманитарен конвој. Околу 100 камиони со храна, лекови и основни средства преминаа преку граничниот премин Керем Шалом, во обид да се ублажи влошената состојба на населението.
Неколку часа претходно, израелската армија најави дека ќе спроведува дневна „тактичка пауза“ во воените дејства, во хуманитарни цели. Паузата ќе важи секој ден од 10 до 20 часот, во три подрачја – Ал-Маваси на југозапад, Деир ал-Балах во централниот дел и градот Газа на северот – каде што, според израелската страна, не се изведуваат воени операции.
Иако Израел претходно ја означи Ал-Маваси како „хуманитарна зона“, таа беше повеќепати нападната, при што имаше бројни жртви. Во Деир ал-Балах, каде се наоѓа централното складиште на Светската здравствена организација (СЗО), беше пријавено оштетување на капацитетите при претходни копнени напади.
Покрај тоа, Израел отвори хуманитарни коридори од 6 до 23 часот, за да овозможи на ОН и хуманитарните организации доставување помош до населението.
Овие потези доаѓаат под силен меѓународен притисок, поради ограничениот пристап до храна и лекови од прекинот на примирјето во март. СЗО неодамна предупреди на смртоносна криза со глад, при што според податоците на палестинското министерство за здравство, досега од неухранетост починале 125 лица – од кои 85 деца.
