Њујорк, 27 јули 2025 – На седницата на Советот за безбедност на Обединетите нации дојде до остар дипломатски судир меѓу Соединетите Американски Држави и Кина, откако американската делегација ја обвини Кина за индиректна поддршка на руската агресија врз Украина.
Вршителката на должноста американска амбасадорка при ОН, Дороти Ши, изјави дека Кина мора да престане со извозот на производи со двојна намена во Русија, нагласувајќи дека токму такви компоненти се користат во руските беспилотни летала, оружје и воени возила. „Ако Кина искрено повикува на мир, треба да престане да ја поттикнува руската агресија“, рече Ши.
Кина остро ги отфрли обвинувањата. Заменикот на кинескиот амбасадор при ОН, Генг Шуанг, возврати дека Пекинг не е страна во конфликтот и дека строго го контролира извозот на чувствителни материјали. Тој ја обвини Америка дека префрла одговорност и поттикнува тензии наместо да придонесува за мир. „САД треба да играат конструктивна улога во постигнување примирје, а не да создаваат конфликти“, рече Генг.
Тензиите меѓу двете светски сили ескалираа по најновите извештаи дека Кина тајно извезува мотори за дронови во Русија, заобиколувајќи ги западните санкции. И покрај декларативната неутралност, Кина останува еден од најважните економски сојузници на Русија, со значителен извоз на технологија и континуирано купување руска сурова нафта.
Загриженост дополнително предизвика изјавата на кинескиот министер за надворешни работи Ванг Ји, кој, според информации на South China Morning Post, изјавил дека „Кина не може да си дозволи пораз на Русија во Украина“. Украинскиот претседател Володимир Зеленски ја обвини Кина дека со своето однесување го продолжува војниот конфликт и дека фактички се става на страната на Кремљ.
Блиските односи меѓу Пекинг и Москва ќе добијат нов импулс во септември, кога се очекува рускиот претседател Владимир Путин да ја посети Кина на самитот на Шангајската организација за соработка, каде ќе се сретне со кинескиот лидер Си Џинпинг.
