Девет пожари сѐ уште беснеат низ Македонија, заканувајќи се на села, куќи и шумски предели, предупредува Центарот за управување со кризи (ЦУК). Вкупно 15 пожари се регистрирани до пладнево, од кои шест се ставени под контрола, додека останатите девет се активни и опасни.
Најкритични жаришта се регистрирани во источниот и јужниот дел на државата. Во Малешевските Планини, кај Берово, Василево и Радовиш, гори нискостеблеста шума и смрека. Во Прилеп, пожарот кај селото Бешиште се шири и не може да се гаси поради детонации. Огнот се движи кон селата Градешница и грчката граница.
Голем пожар беснее и меѓу Прилеп и Кавадарци, каде гори мешана шума околу селата Царевиќ, Смолани, Радобил и Трстеник. Во Македонски Брод се активни пожари кај селата Црешево и Локвица, а во Желино – меѓу Церово и Групчин. Крива Паланка и Македонска Каменица пријавуваат горење на борова шума кај селата Нерав и Ќосевица.
Во Чашка, кај селото Ореше, гори букова шума, а во Илинден – меѓу Мршевци и Бучинци – пожар зафати стрништа.
Иако шест пожари се ставени под контрола, ситуацијата останува нестабилна. Под набљудување се пожарите кај Куманово, Грешница, Селце, Јунузлија, Горно Црско и Катланово.
ЦУК апелира граѓаните да бидат крајно внимателни, да не палат оган на отворено и веднаш да пријавуваат пожари. Ветерот и топлото време ги влошуваат условите и го зголемуваат ризикот од нови пожари.
