Балкан

Бугарија во пламен: 100 активни пожари, најкритично во Хасковско

Пожарната состојба во Бугарија станува сè позагрижувачка – во моментов се активни 100 пожари низ целата земја, според најновите податоци на бугарската противпожарна служба објавени за „По света и у нас“. Најсериозно е во Хасковскиот регион, каде што се регистрирани 18 активни огништa. По 7 пожари беснеат во Благоевградско и Старозагорско, а по 6 активни жаришта има во Пловдив и Велико Трново.

Од почетокот на јули до денес, бројот на повици до службата 112 е зголемен за 60.000 споредено со јуни – што јасно ја отсликува влошената ситуација.

Во обид да се засилат капацитетите за справување со катастрофата, денес во Бугарија пристигна четвртиот хеликоптер побаран преку Механизмот за цивилна заштита на Европската унија.

Главниот секретар на МВР, гл. ком. Мирослав Рашков, кој привремено ја извршува функцијата, реагираше на критиките од претседателот Румен Радев, нагласувајќи дека веќе се спроведуваат процедури за набавка на нова опрема за борба со пожари.

„Оперативната состојба е многу комплицирана – дневно имаме меѓу 200 и 300 пожари. Силниот ветер дополнително ги отежнува напорите. Во 90% од случаите, станува збор за човечка грешка, немарност, а понекогаш и за намерни палења“, изјави Рашков.

Тој додаде дека Генералната дирекција за противпожарна заштита располага со доволно техника, но дека се прават напори за модернизација. Рашков нагласи дека во кризни моменти, како овој, меѓународната соработка преку европскиот механизам е клучна, бидејќи ниту една држава нема доволно летала за справување со вакви обемни пожари.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.