Пазарите негативно реагираа на новиот трговски договор меѓу Европската Унија и Соединетите Американски Држави, поради што еврото денеска забележа најголем еднодневен пад во однос на доларот од мај наваму. Валутата се лизна за 1% во однос на американскиот долар, достигнувајќи 1,162 долари, а изгуби и 0,9% вредност во однос на британската фунта.
Според договорот постигнат во неделата, поголемиот дел од извозот на ЕУ во САД ќе се соочи со царина од 15%. Иако оваа стапка е значително пониска од првично најавените 30% од страна на американскиот претседател Доналд Трамп, пазарите се загрижени дека ова ќе предизвика удари врз европскиот извозен сектор, особено во чувствителни индустрии како автомобилската и машинската.
„Одлично е што има договор, но реално ова е влошување на трговските односи“, изјави Тревор Гритам од „Ројал Лондон Асет Менаџмент“.
Финансиските пазари реагираа бурно – германскиот индекс DAX изгуби 1% во доцното попладне, откако утринските добивки беа избришани од новата неизвесност. Францускиот премиер Франсоа Бајру го нарече договорот „капитулација“, а критики пристигнаа и од десничарските лидери во Франција и Германија.
Од Брисел, претседателката на Европската комисија Урсула фон дер Лајен изјави дека договорот носи „сигурност во неизвесни времиња“ за граѓаните и бизнисите на двата континента. Но, инвеститорите очигледно не се убедени дека новите услови ќе имаат долгорочен позитивен ефект.
Трамп, пак, од Шкотска порача дека следни на удар ќе бидат земјите без трговски договори со САД, на кои им се закани со 20% тарифи. Тој најави и нови царини за фармацевтски производи, што дополнително ја зголеми загриженоста на глобалните пазари.
