Република

Аларм за езерото Младост: Нечиста вода, фекалии и недостаток на кислород го загрозуваат велешкиот бисер

Состојбата на велешкото езеро Младост е алармантна. Водата е забележливо нечиста, со непријатен мирис што потсетува на фекалии, а визуелниот изглед на езерото предизвикува сериозна загриженост кај граѓаните и стручната јавност.

Според Комисијата за следење на состојбите на водите, формирана од Советот на Општина Велес, анализите во последните две години покажуваат висока концентрација на органски материи, голем број колиформи бактерии, висока електропроводливост и исклучително ниско ниво на кислород во водата – што укажува на сериозен степен на загаденост.

„Станува збор за процес што трае со години, но состојбата кулминираше во последниот период. Довод на свежа вода во акумулацијата нема, а отовичка река има слаб проток само во зимските месеци. Темелниот испуст од акумулацијата е нефункционален, а истек на вода – практично нема“, изјави Антоанета Стојанова, претседателка на комисијата.

Како клучни причини за лошата состојба, се посочува и човечкиот фактор. Долг период имало неприклучени индивидуални куќи на колекторскиот систем околу езерото, кои дури сега почнуваат да се приклучуваат технички. Тоа, според комисијата, влијаело врз забрзана вештачка еутрофикација – стареење и загадување на езерото.

Од ЈП „Водостопанство Лисиче“ информираат дека ќе започнат со интервенции за санација на состојбата со средства добиени од државни програми. „Ќе искористиме 6 милиони денари од Министерството за земјоделство – 5 милиони се наменети за ископ на бушотини и снабдување со свежа вода, а 1 милион за чистење на крајбрежјето. Дополнително, преку програмата за животна средина добивме 4 милиони денари за санација на темелниот испуст од браната“, изјави директорот Ванче Маневски.

Од Центарот за јавно здравје Велес сè уште не се објавени официјалните резултати за квалитетот на водата, но комисијата предупредува дека е потребна итна и координирана реакција од сите надлежни институции, за да се спречи целосно еколошко уништување на едно од најпознатите велешки излетнички места.

Извор: Телма.мк

Република

Повеќе тетовски села утре без електрична енергија поради планирани прекини

Повеќе села во тетовскиот регион утре, 18 декември, ќе останат без електрична енергија поради планирани прекини во снабдувањето со струја, информираат надлежните служби.

Без струја во периодот од 09:00 до 14:00 часот ќе бидат делови од селото Челопек, и тоа објекти лоцирани во средниот дел на селото, како и објекти во близина на училиштето. Исто така, прекин во снабдувањето ќе има и во селото Милетино, каде без електрична енергија ќе останат објекти во близина на автобуската станица во т.н. Македонско Маало.

Планиран прекин е најавен и за селото Порој, каде дел од населението исто така ќе биде без струја во истиот временски интервал.

Од надлежните апелираат граѓаните навремено да ги планираат своите обврски и информираат дека прекините се дел од редовни активности за одржување и унапредување на електродистрибутивната мрежа.

Република

Проданоски ги отвори вратите на Општината за најмладите

Кабинетот на градоначалникот на Општина Прилеп, Дејан Проданоски, денеска беше исполнет со детска љубопитност и насмевки, откако во посета пристигнаа четвртоодделенци кои, во рамки на наставната програма, учат за локалната самоуправа и надлежностите на градоначалникот.

Учениците имаа можност одблизу да се запознаат со работата на општината, поставувајќи бројни интересни и искрени прашања, на кои градоначалникот одговараше низ пријатен и едукативен разговор.

Проданоски истакна дека ваквите средби се особено значајни, бидејќи ја поттикнуваат младата генерација да развива интерес за општествените процеси и институциите.

„На младите им припаѓа иднината, а наша обврска е континуирано да работиме на подобрување на условите за живот и создавање подобра и посигурна иднина за нив“, порача градоначалникот Проданоски.

Република

Општина Битола инсталира фотоволтаици во уште три училишта

Општина Битола продолжува со активна имплементација на праведната енергетска транзиција, со цел поголемо искористување на обновливите извори на енергија.

На следната седница на Советот на Општина Битола ќе се разгледува анекс на договорот со Фондацијата Отворено Општество, со кој Општината ќе добие донација за поставување фотоволтаици на уште две основни училишта – „Св. Климент Охридски“ и централното училиште „Даме Груев“.

Анексот претставува дополнување на претходниот договор, со кој минатата година беа инсталирани фотоволтаици на шест основни училишта во градот.

Во рамки на заложбата за искористување на обновливата енергија, Општината ќе постави фотоволтаици од сопствени средства и на една од зградите на основното училиште „Гоце Делчев“.

Овој проект е дел од стратегијата на Општина Битола за поддршка на одржливи решенија и намалување на трошоците за енергија во образовните институции.