Портпаролот на Кремљ, Дмитриј Песков, изјави дека Русија ја примила на знаење најновата изјава на американскиот претседател Доналд Трамп во која тој го скрати рокот за постигнување примирје во Украина на 10 до 12 дена.
„Изјавата на американскиот претседател е примена на знаење. Русија останува посветена на мировниот процес во Украина и на заштита на своите национални интереси“, нагласи Песков.
Тој додаде дека, и покрај зголеменото внимание околу можноста за средба меѓу Трамп и рускиот претседател Владимир Путин, таа тема „не била на дневен ред, ниту сега е“.
Изјавата на Песков уследи откако Трамп во Шкотска, по средбата со британскиот премиер Кир Стармер, изјави дека „нема напредок“ и дека е разочаран од Русија. „Поставувам нов рок, околу 10 или 12 дена од денес. Нема причина да се чека. Сакав да бидам дарежлив, но едноставно – нема напредок“, рече Трамп.
Американскиот претседател претходно најави дека доколку Москва не прифати примирје, ќе воведе строги санкции – 100% царини кон земјите кои тргуваат со Русија, особено купувачи на руска нафта.
