Првиот вицепремиер и министер за животна средина и просторно планирање г. Изет Меџити денеска потпиша 2 договори во вредност од околу 10,7 милиони евра со кои ќе обезбеди и испорача нова опрема за управување со отпад за 18 општини од Југозападниот и Пелагонискиот регион, како дел од реализацијата на Регионалниот проект за управување со цврст отпад.
Со овие два договора, информираше Меџити е опфатено снабдување на општините Дебар, Струга, Битола, Кичево Прилеп, Долнени и други рурални општини со сеопфатна механизација: контејнери, канти, специјализирани камиони-компактори, скип-лифтови и кипер возила, односно сè што е потребно за ефикасно собирање, транспорт и одлагање на отпадот од страна на комуналните претпријатија во општините, во согласност со европските стандарди.
“Со оваа значајна испорака на опрема која е сериозен чекор напред кон одомаќинување на европските еколошки стандарди, продолжуваме со реализација на нашата стратешка цел – изградба на одржлив и интегриран регионален систем за управување со отпад. Благодарност до сите партнери кои денеска се со нас и сесрдно го поддржуваат овој процес“ изјави министерот за животна средина и просторно планирање Изет Меџити.
Опремата, согласно доставените барања од општините, се состои од:
• Пластични канти со капацитет од 120 литри,
• Метални контејнери со волумен од 1.1 м³,
• Специјализирани камиони-компактори со капацитет од 8 и 12 м³,
• Скип-лифт возила за собирање на отпад,
• Камиони-кипери за транспорт на отпаден материјал.
Новата механизација овозможува поефикасно собирање, транспорт и управување со отпадот и ќе се стави во функција на подобра јавна хигиена и заштита на животната средина. Со неа директно се подобруваат условите за работа на општинските јавни претпријатија и се овозможува поголема достапност на комуналните услуги за граѓаните.
Финансиската поддршка за оваа набавка е обезбедена преку Европската банка за обнова и развој (ЕБРД), со дополнителна помош од Швајцарскиот државен секретаријат за економски прашања (SECO), Инвестициската рамка за Западен Балкан (WBIF) и Владата на Шведска преку СИДА.
