Република

Пожарите се шират низ државата, најкритично кај Прилеп, Кавадарци и Малешевијата

Најмалку седум пожари сè уште беснеат низ Македонија, а најкритичните точки се во регионите кај Прилеп, Кавадарци, Македонска Каменица и Малешевските Планини. Огнената стихија зафати шуми, села и планински падини, додека пожарникарите се борат со тежок и непристапен терен.

Според податоците на Центарот за управување со кризи, од вкупно 27 регистрирани пожари на отворен простор, 7 се сè уште активни, 3 се ставени под контрола, а 17 се изгаснати.

Најопасна е ситуацијата кај селото Нивичино, каде пламените јазици горат низ Голем Готен и Малешевските планини, а огнот зафаќа нискостеблеста шума, грмушки и смреки. Во Прилепскиот регион, пожарот кој започна кај селото Бешиште се шири кон село Градешница и државната граница со Грција. Таму интервенцијата е ограничена поради присуство на неексплодирани боеви средства.

Гори и во подрачјата помеѓу прилепските села Царевиќ, Смолани, Радибил и Дрен, како и кај селата Галиште и Трстеник во Кавадарци. Во Македонски Брод, деградирана дабова шума гори меѓу селата Црешево, Локвица и Крапа.

Во источниот дел на земјата, кај Ќосевица (Македонска Каменица), активен е пожар со висока интензивност во борова шума, а во Чашка, во селото Ореше, огнот зафаќа и букова шума. Во Кичевско, повторно е активен пожарот кај селото Горно Црско.

Три пожари се ставени под контрола: кај селото Грешница (Македонски Брод), помеѓу Драгоево и Селце (Штип) и во Јунузлија (Карбинци). Изгаснати се 17 пожари, меѓу кои и оние кај Битола, Куманово, Тетово, Охрид и Ресен.

Во некои случаи се сомнева на намерно палење, додека во други причината е човечка небрежност. Властите апелираат до граѓаните да не палат оган на отворено и да пријавуваат секој сомнителен чад, бидејќи временските услови и натаму создаваат ризик од нови пожари.

Република

Повеќе делови од Тетово утре без електрична енергија

Повеќе делови од Тетово утре, 17 декември 2025 година, ќе останат без електрична енергија поради планирани прекини во дистрибутивната мрежа.

Според најавата, прекините ќе се одвиваат во периодот од 09:00 до 14:30 часот и ќе зафатат различни делови од градот. Без струја ќе бидат објекти на улицата „Борис Кидрич“, како и делови во кругот на поранешната печатница „Напредок“.

Дополнително, прекин е најавен и за делови од Тетово во населбите Два Бреста и Певчина, каде електричната енергија ќе биде исклучена во периодот од 09:20 до 13:00 часот.

Од надлежните служби информираат дека станува збор за планирани активности и апелираат до граѓаните навремено да ги прилагодат своите обврски.

Република

Лажни дојави на бомби: како се обезбедуваат училиштата во Македонија

Министерот за внатрешни работи, Панче Тошковски, потврди дека лажни дојави на бомби се забележани во повеќе градови и дека секогаш се постапува согласно антитерористички протоколи, без разлика дали дојавата е во училиште или на друго место со поголем број граѓани.

Министерката за образование и наука, Јаневска, истакна дека упатството за постапување по дојави на бомби е доработено и доставено до сите училишта, но МОН нема прецизна информација како се спроведува на терен. Таа посочи на несоодветна комуникација помеѓу врвните институции и локалните структури, додавајќи дека обврски имаат и градоначалниците и директорите на училиштата, особено во делот на евакуацијата и превозот на учениците.

„Сакам да ве уверам дека постапуваме согласно стандарди и протоколи како и останатите европски земји, делуваме превентивно и со целосна грижа за безбедноста на граѓаните, особено на децата“, изјави Тошковски. Тој додаде дека при појава на проблеми, тие се решаваат во најбрзо време и дека безбедноста на учениците останува прв приоритет.

Министерот потенцираше дека МВР сега многу поефикасно се справува со лажните дојави и дека максимално се преземаат сите дејствија во надлежност на министерството.

Република

Намалена видливост поради магла: внимателно на овие патишта

Поради појава на магла, видливоста во околината на Дебар е намалена до 50 метри, соопшти Автомото сојузот на Македонија (АМСМ).

Сообраќајот на државните патишта се одвива непречено, со претежно суви коловози, додека надвор од градските средини интензитетот на сообраќај е умерен. На граничните премини од македонска страна нема подолги задржувања за влез и излез од државата.

АМСМ препорачува возачите да се движат со прилагодена брзина, да ги почитуваат поставените сообраќајни знаци и внимателно да управуваат со возилата, особено на патиштата низ котлините, речните долини и клисурите каде постои ризик од одрони.

Посебна внимателност се советува на делниците: Катланово – Велес, Маврово – Дебар – Струга, Виница – Берово и Кочани – Делчево.