Во еден од најсмртоносните напади во последните месеци, руските сили синоќа го бомбардираа казнено-поправниот дом во регионот Запорожје, при што загинаа најмалку 16 затвореници, а 35 се повредени, соопштија украинските власти. Зградите на затворот се целосно уништени, а оштетени се и блиски приватни домови.
Истовремено, во одделни ракетни напади во регионот Дњепропетровск, загинаа уште двајца цивили, а погодени беа породилиште и градска болница во градот Камјанске. Пет лица се ранети, меѓу кои две жени во тешка состојба – една од нив бремена.
Локалните власти информираат дека осум ракети, меѓу кои и моќни авионски бомби, биле истрелани кон Запорожје, регион кој често е цел на руски воздушни напади од почетокот на војната во 2022 година.
Во Камјанске, погодени се и објекти од витално значење – оштетени се породилното и терапевтското одделение на болницата, детска клиника, училишта, градинки и дури 49 станбени згради. Неколку возила на паркингот на болницата целосно изгореле. Сите пациенти се евакуирани и префрлени во други здравствени установи.
Украинските власти нападите ги оценија како уште едно брутално кршење на меѓународното хуманитарно право, додека претседателот Володимир Зеленски повторно апелираше за засилена поддршка од сојузниците.
