Најмалку 30 лица го загубија животот во Пекинг поради силните поројни дождови што ја погодија кинеската престолнина изминативе денови, соопшти Општинската канцеларија за контрола на поплави.
Најголем број жртви – 28 – се регистрирани во северниот планински регион Мијун, а две лица загинале во областа Јангце. Истовремено, повеќе од 80.000 жители се евакуирани поради опасноста од нови свлечишта и надојдени води.
Екстремното време е предизвикано од влез на топол и влажен воздух од суптропскиот антициклон, кој донесе врнежи што достигнаа и до 543,4 милиметри во северните делови на градот – количина која вообичаено паѓа за неколку месеци.
Градските власти активираа највисоко ниво на аларм за итни случаи, а доцна синоќа претседателот на Кина, Си Џинпинг, нареди обемни спасувачки акции за намалување на последиците и спасување на загрозените. Тој изјави дека поплавите предизвикале „значителни човечки и материјални загуби“ не само во Пекинг, туку и во провинциите Хебеј, Џилин и Шандонг.
Спасувачките екипи се уште се на терен, а властите предупредуваат на можност од нови врнежи и повикуваат на максимална претпазливост.
