Американскиот претседател Доналд Трамп драстично го скрати рокот за постигнување примирје во Украина, најавувајќи дека во рок од 10 до 12 дена ќе воведе жестоки економски санкции против Русија и нејзините трговски партнери, доколку Кремљ не престане со нападите врз украински цивили.
Ова претставува досега најстрог ултиматум од Вашингтон, кој предвидува 100% царини за сите држави што продолжуваат да купуваат руска нафта и гас. САД веќе ги предупредија земјите како Кина, Индија и Турција, како и некои членки на ЕУ, дека ќе се најдат под ударот на санкциите доколку не го променат курсот.
„Не гледаме никаков напредок. Нема повеќе чекање“, изјави Трамп, обвинувајќи го рускиот претседател Владимир Путин дека лаже за мир додека продолжува со брутални ракетирања во Украина. Само изминатата ноќ, Русија нападна 73 населени места, при што загинаа 22 цивили, меѓу кои и 17 затвореници во Запорижје.
Руската страна, пак, одговори со остри зборови. Дмитриј Медведев, поранешен претседател, го обвини Трамп дека „игра игра на ултиматуми“ и го предупреди дека Русија не е ни Израел, ни Иран – и дека секој нов ултиматум е чекор поблиску до директен судир меѓу САД и Русија.
Но предупредувањата не доаѓаат само од Москва. Аналитичарите предупредуваат дека вклучување на Кина во новиот санкциски круг може да предизвика глобален трговски конфликт. Министрите од администрацијата на Трамп веќе се во Пекинг на преговори, обидувајќи се да ја одвратат Кина од поддршка на Русија, но првичните сигнали се дека Пекинг не е подготвен на отстапки.
Во меѓувреме, САД испратија сигнал дека не сакаат ескалација со Кина – администрацијата на Трамп неодамна му забрани на тајванскиот претседател Lai Ching-te да се задржи во Њујорк и Далас за време на патување, откако Пекинг остро реагираше.
Сите очи сега се вперени во следниот потег на Доналд Трамп. Ќе го реализира ли ултиматумот или ќе попушти под притисокот од можен глобален судир? Од таа одлука ќе зависи не само исходот на војната во Украина, туку и стабилноста на целиот меѓународен економски поредок.
