Украинскиот претседател Володимир Зеленски денеска потпиша закон кој овозможува украинците постари од 60 години да служат во вооружените сили врз основа на доброволен договор, пренесе агенцијата „Укринформ“.
Со новата законска рамка, лицата што ја надминале возраста за редовна воена служба, но имаат желба да учествуваат во одбраната на земјата, ќе можат да склучат едногодишен договор со армијата – под услов да добијат одобрение од командантот на единицата каде што сакаат да бидат распоредени.
Законот предвидува и двомесечен пробен период, по кој договорот ќе биде прекинат доколку се утврди дека лицето не е способно за служба. Договорите ќе можат да се продолжуваат, доколку тоа го дозволуваат здравствената состојба и воените потреби.
Зеленски го потпиша законот откако тој беше изгласан во Врховната рада на 16 јули.
Потегот доаѓа во контекст на продолжениот воен конфликт со Русија, во кој Киев постојано бара нови извори на човечки капацитет за одбрана и поддршка на фронтот.
